Shillong Lber 30: Ka Coordination and Welfare Committee, Shella Bholaganj Block, kala phah da ka jingthoh sha u Myntri Rangbah ka jylla u Conrad K Sangma bad dawa ba dei ban kem mardor ia ki briew kiba donkti ha kaban pyniap ia ki arngut ki bar jylla ha Ichamati ha ka 27 tarik u Lber.
Katkum ka shithi kaba la phah da u President ka CWC (Shella Block) u Gopal Dey, ula kynnoh ba ar ngut ki bar jylla kiba kynthup ia u Ishan Singh and Sujit Dutta kila shah pyniap ha ki runar jong ka Khasi Students Union (KSU) bad kila pynpaw ba ka shnong Ichamati kadei ka shnong kaba hap ha ka East Khasi Hills District ia kaba la pyllait iaka jingpyntreikam ia ka CAA namar ba kadei ka jaka kaba hap ha ka Sixth Scheduled, kadei ka jaka kaba ka Khasi Students Union kala pynlong iaka jingialang ban pyrshah CAA kaba la ialam sha ka jingshah pyniap jong u Ishan Singh bad u Sujit Dutta.
Ka CWC kala buh jingkylli ruh ba kumno la ailad ban pynlong ia ka rally ha Ichamati haba la pyntreikam ia ka Code of Conduct bad shaei ki pulit ki don haba ki dkhot ka KSU kila wan da ki kali ha Ichamati bad sdang ban thombor ia ki bar jylla kiba dei ki rit paid kaba la pynmih iaka jingpynjot pynpra bad jingpyniap ia uwei u Bengali bad uwei u Adivasi uba dei u nongbylla ha ki par maw?
“Hato ka sorkar jylla kadei ka sorkar tang jong kawei ka jaidbynriew? Hato ki bar jylla kim dei satia ki nongthep vote ne nongshong shnong ka Meghalaya? Hato ka sorkar kam donbor satia ban leh da kaba tyngeh pyrshah ia katei ka kynhun ha Meghalaya? Sa katno ngut dang donkam ban shim iaka jylla bad iaka sorkar pdeng ban iohsngew iaka jingiam jong ki bar jylla ha Meghalaya? La buh jingkylli ka CWC.
“Katei ka jingjia hadien ka rally pyrshah CAA kaba la pynlong da ka KSU bad kiwei pat ki sengbhalang ha Ichamati, katkum ka jingpynpaw jong ki lad pthai khubor. Ka sien kaba khatduh kaba la mih ka jinghuri hura ha Ichamati kaba la pynsohsat ia ki bar jylla kiba sah haka thaiñ, wat haba la sakhi ia katei ka jingjia ha u snem 2020 ha Ichamati, balei ki bor ba dei khmih kila ai jingbit ia ka kynhun ban pynlong ia ka Rally ha katei kajuh ka jaka? La buh jingkylli biang ka CWC.
“Nga phah ia kane ka jingthoh ba phin ai ia ka hok jong kitei ki arngut kiba la khlad noh bad ia ka iing ka sem ka jong bad kumjuh ia kiwei pat ki khun kynthei bad shynrang ka Meghalaya kiba mad iaka jingshah niewbeiñ ne da kumwei pat, tang namar ba kim dei na ka jaidbynriew kaba heh paid. Nga phah ia kane ka jingthoh ban pynpaw iaka jingsngewkhia ha kaba iadei bad ka jinglong jingman ki bar jylla ha Meghalaya. Ki aiñ bad ki kyndon aiñ ha ka jylla, kiba pyrshang ban iada ia ki riewlum tynrai kila ktah bad buh jingeh ia ki bar jylla ki bym dei riewlum. Katto katne ki jingpyrkhing, ki kyndon ain bad ki aiñ kala pynlong ia ki bar jylla ban shong ban sah bad ban trei ban ktah ha ka jylla, kaba la pynduna iaka kamai kajih bad ia ka rukom im” la pynpaw u Gopal Dey.
Nalor kane ka CWC kala pynpaw ruh ha kaba iadei bad ka jingeh ki bar jylla namar ka jingbym don ka jingmihkhmat ha ka kam saiñ pyrthei bad kane kala pynduna ia ka sur jong ki bar jylla bad kala buh ha ka jingeh ia ki ban ai kano kano ka jingpynsngew ha ka jingshim ia ki rai kiba ktah iaka jingim jongki bad kila pynpaw ruh ba kila mad ruh ia kiwei kiwei ki jingeh bad jingshah banbeiñ.
Ka CWC ka kyntu ia ki bor ba dei khmih ban pdiang ia kine ki jingai jingmut na ka bynta ban kyntiew ia ka rukom long rukom man jong ki bar jylla ha Meghalaya.
