Kitbok ka KSU ia ka Sorkar ban pynioh noh ia ka ILP
Shillong, Naitung 17 : Ka Jaidbynriew Khasi ha ka sngi Nyngkong, kala kynmaw burom ia u Nongiakhun laitluid- U Tirot Sing Syiem, uba iakhun thma pyrshah ia ka Ri Bilat, ha ka sngi iap ba 188 snem jong u.
Ki Nongialam ka Khasi Students Union (KSU), Hynniewtrep National Youth Front (HNYF), Hynniewtrep Integrated Territorial Organization (HITO) bad kiwei kiwei, kila leit iabuh syntiew bad sngap jar ba shiminit ha u Motsahnam jong u Tirot Sing uba don ha Madan Iewrynghep.
Ki Nongialam bad ki ehrang jong ka seng Hynniewtrep National Liberaton Council (HNLC) ruh kila iasnohkti lang ban kyn maw burom ia une u nongiakhun laitluid.
U Vice Chairman ka HNLC Manbhalang Jyrwa bad Political Secretary Aristerwelll Thongni, kila leit buh syntiew bad salute ia u mot sahnam jong u Tirot Sing.
Haba iaren bad ki nonthoh khubor, u President ka KSU samla Lambokstarwell Marngar ula dawa ia ka Kynhun Sorkar ka Jylla ba kin leit sha Delhi bad wan phai bad u soh ba pynthikna ban pyntreikam noh mardor ia ka Inner Line Permit (ILP) ha Meghalaya bad ban pynrung noh ia ka ktien Khasi ha ka khyrnit ba phra jong ka Riti Synshar ka Ri.
Ula kynthoh ia kane halor ka jingkren jong u Symbud Myntri Rangbah Bah Prestone Tynsong ba ong ba ka kynhun Myntri ka Jylla kin sa leit shen ban iakren bad u Myntri Rangbah Duh Narendra Modi bad Myntri kam Pohiing Amit Shah halor ka resolution bala mynjur halor kine ki artylli ki mat.
“Ngi phah ia ka jingkitbok ia baroh ki Myntri Sorkar halor ka jingleit iakynduh bad ka Sorkar India bad ba kin wanphai da ka jubab ka ban pynkmen ia ka Jylla, kata ban pyntreikam noh ia ka ILP bad kynthup ia ka ktien Khasi ha ka khyrnit ba phra” ong u samla Lambok.
“Ngi kwah ban kren shai sha ki ba kam dei shuh ka por ba kin kut tang ka leit Delhi. Ha kane ka kynti ngi kwah ba kin wan ai jingtip kaba shai halor kaei kaba mih na ka jingiakren bad ki daw kiba pynlong ia ka Sorkar Pdeng ban pynslem ia ka rai halor kine ki artylli ki Resolution ka Jylla” ula ong haba bynrap “Ngi kwah ban tip khnang ba ngin lah rai ia ka sienjam ban sa shim halor kine ki kam”.
Haba pynpaw ba ka jingwan rung kyrthep ki bar Jylla kala jur bha namar ka jingbym don ki ain ba pyrrkhing, u samla Lambok ula ong “Namar kata, ka por kala dei ba ka Sorkar kan pyrkhat bad shimkhia bha ia kane ka kam”.
Haba kylli, u samla Lambok ula ong ba lada ka Sorkar Pdeng ka dang pan por shuh shuh ban shong bishar ia ka ILP Resolution, kane kan phalang ba kam khein sngep ia ka Iingdorbar Thaw Ain ka Jylla bad kan pyni ruh ba ki 60 ngut ki MLA ka Jylla kila pheil ia ka Jylla.
“Ka Resolution ka dei kaba tang shi sla ym ba 2000 sla. Namar kata, ka Sorkar India ka dei ban kren shai halor ki daw balei ba kam pat kwah ai ILP ia ka Meghalaya haba ka lah ban ai ILP ia kiwei ki Jylla ka thain Shatei Lam Mihngi kum ka Manipur, Mizoram, Arunachal Pradesh bad Nagaland” ula ong.
Ha kajuh ka por, ka KSU kala thalain tyngeh ia ka Sorkar Jylla halor ka jingbym lah ban pyntreikam ia ka Meghalaya Residents, Safety and Security Act (MRSSA), 2016 bad ong “Ngim tip satia kaei ka daw ba ki buhrieh haduh mynta ia kane ka Ain”.
Haba kren halor ka rai jong ka Sorkar ban pynkylla ia ka MRSSA ha u snem 2020, u samla Lambok ula ong ba ka don ka jingiasuh buit sop sop pyrshah ia ki paid riewlum trai ri ka Jylla bad ong “Kino kino ki ain bala pynwandur ban ai jingiada ia ki paid riewlum trai ri kin shu kut tang ha ka jingbishar. Ngam lah ban tip kaei ka jingthmut hynrei kito kiba shong ha Secretariat kin tip kham bha ba balei ki donkam ia ka Sorkar Pdeng ban bishar ia kum kane ka ain. Lada kito kiba la shah jied kim lah ban thaw ain, kaei ka jingmut ban don ia ka Secretariat?”.
Ula ther tyngeh ruh halor ka jingbym lah jong ka Sorkar ban pynieng ia ki Entry bad Exit Point ban tehlakam ia ka jingrung kyrthep ki mynder kat kum ka MRSSA, 2016.
Pule ruh: Kut jingmut ka Sorkar ban tyngkai ia ki jaka bad jingtei sahnam ka Jylla
