SHILLONG, NAITUNG 17: Ka HYC mynta ka sngi ka 17 tarik Naitung 2022 ka la leit ban buh Syntiew ha u maw mot sahnam jong u Tirot Sing Syiem hapoh ka shnong Mairang.
Shwa kane ka la don ka jingialang ba lyngkot ha kane ka step, kum ka dak ka jing kynmaw burom ia ka lyngkhuh sngi iap ba 187 (1835-2022) jong une u Syiem Bakhraw ka Hima Nongkhlaw uba la Len lade na bynta ka dawbah jong ka Jaidbynriew.
Haba ai jingkren u Vice President ka seng Bah Donboklang u la ong 187 tylli ki snem ba ki la iaid, ki dang kynmaw burom ia une u Syiem jong ka Hima Nongkhlaw. “Balei ia kiba bun ki Syiem kiba iap hadien jong u, ngim ju don ka jingkynmaw burom kaba kum kane, lehse nga lah ban ong ba u Tirot Sing kum u Syiem u la ai shisha u synniang kum u Riew ialeh, uba kum ka Jaidbynriew ka dei ban pyrto bad nang iai pyrto junom,” u la ong.
Hadien ba la buh syntiew, la pynlong ka jingsngap jar ba shi minit kum ka dak ka jingkynmaw burom ia une u Syiem bakhraw ka Jaidbynriew .
