Shillong, Nailar 13 : Ka Hynniewtrep National Liberation Council (HNLC), ha ka sngi Ba-ar ka la kynmaw burom ia ka lyngkhuh sngi iap ba lai snem jong u General Secretary barim ka seng bah Cherishterfield Thangkhiew.
Ha ka kyrwoh, u General Secretary-cum-Publicity Secretary ka HNLC Bah Sainkupar Nongtraw u la ong, “(Ngi) kynmaw burom ïa ka lyngkhuh sngi khlad ba 3 snem jong u nongïalam ba donburom, u nonghikai, bad u briew ba ïohi jngai jong ngi, u Bah Cherish.”
“Katba ngi dang sngewsih ia ka jingduh noh ia une nongialam uba phylla, ka nam jong u kan dang iai neh. Kumba leh ki longshuwa jong ngi, u Bah Cherish u la iehnoh ia ka lynti na ka bynta ka jinglaitluid jong ngi. Ki Nongshun ki lah ban pyniap ia u da u kuli, hynrei kim lah ban pynduh ia ki jingmut jingpyrkhat jong u,” u la ong.
U Bah Sainkupar ula ong ba la seng ia ka HNLC ha u snem 1987 da u Bah Cherish, Bah Sounder Cajee, Bah Founder Cajee, Bah John Kharkrang, Bah Julius Dorphang, u Vincent Sangma, bad kiwei kiwei kynthup ia u ophisar shipai India ba la shongthait bad u Bank Manager, ka HALC ka la kylla long ka HNLC ha u snem 1992, katba ki hynmen ki para jong ngi ki Achik, ki la thaw ia ka ALMA.
“U Bah Cherish u dei tang ma u na ki nongseng ka HNLC u bym shym la pynkhein ia ki nongrim jong u lane die noh ia ki briew jong u”, u la ong.
Da kaba kynnoh ba bun ki nongïalam kiba shlur bad kiba stad ha ka jingmut jingpyrkhat ki la shah thombor bad shah pynlong langknia ha ki bor synshar, u Bah Sainkupar u la ong, “Uwei hadien uwei pat, la pynbiej, la pynsngewthuh bakla ïa ki, la pynsngap jar, bad la thied noh ïa ki, kaba la pyntlot ïa ka nongrim jong ki seng Hynniewtrep katba ki agent sorkar ki nang rung bad pynthut ïa ki rukom treikam jong ki. Wat la ha ki snem 80 bad 90 la sakhi ïa ki sur kiba bun kiba kyrshan ïa ka sur jong ki jingeh bad jingjynjar jong ngi lang, hynrei tang khyndiat eh ki dang sah haduh kine ki sngi.”
“U Bah Cherish u ju ong ia nga ba ym don ka spah ne ka burom kaba kham khraw ban ia ka jingpyllaitluid. Dei ma u uba la wanrah ia ka jingmut ban iakhlad bad u la pule bniah ia ki jingialeh jong u Wickliffe Syiem. U Bah Cherish u long u riew shemphang u bym ju pyniakhlad ialade na ki paidbah. U la ïoh ïa ka kyrteng “u nongpynkylla dur” hapdeng ki katto katne ki nongïalam jong ka thaiñ shatei lammihngi namar ka jinglah jong u ban treikam da kaba rieh ha ka nongbah Shillong, kaba pynkulmar jingmut ïa ki bor ka aiñ bad ki bor sorkar,” u la ong.
Shuh shuh u Bah Sainkupar u la ther tyngeh ia ka jingbym don ka jingiatylli hapdeng ki nongmihkhmat bad ki riew sain pyrthei ka Hynñiewtrep.
Na ka liang utei u nongïalam ka HNLC u la sngewsih ruh ba ka sorkar kam don ïa ka economic blueprint.
“Ka sorkar kam don ia ka blueprint ka ioh ka kot; bad u soh jong kane, ki briew jong ngi ki long kiba duk, kiba lah ban shah iuhroit, bad ka Meghalaya ka la kylla long ka jylla kaba shatrai eh ha ka ri India,” u la bynrap.
