Ot ribon u Lat ‘Har Ghar Tiranga’ campaign na Rajbhavan

Shillong, Nailar 13: U Lat ka Jylla u C.H Vijayashankar bad u Myntri ka tnat C&RD u A.T Mondal hynne ka sngi ki la ot ribon ia ka campaign pynher lama lai rong lane ka “Har Ghar Tiranga” campaign ha Raj Bhavan, Shillong.

Haba kren ha kane ka sngi, u Lat u la pynpaw ia ka jingkmen ban iashim bynta ha kane ka jingpyllait paidbah, da kaba ban jur ia ka thong jong ka “Har Ghar Tiranga” ban pynieng ia ka lama ka ri ha man ki thliew iing, kumba la thmu da u Myntri Rangbahduh ka ri u Narendra Modi.

U Lat ula pynpaw ia ka jingdonkam jong kane ka jingialap, kaba kyntiew ia ka jingieid ri bad ka jingiatylli.

Ia ka “Har Ghar Tiranga” la sdang ha ka jingdap 75 snem ka jinglaitluid jong ka ri India, ban pynrung ia ka mynsiem sngew sarong bad ka jingieid ri.

U Lat u la kubur ruh ïa ki jingnoh synñiang jong ka Meghalaya sha ka jingïaleh laitluid jong ka ri India da kaba kdew ïa ki nongïaleh laitluid ba pawnam jong ka Jylla kum u Tirot Sing, u Kiang Nangbah, bad u Pa Togan Sangma.

Ha kane ka jingïalang la sam ïa ki lama lai rong ri bad ka jingpyllait paidbah ïa ki ar tylli ki kot ba la pynmih da ka tnad Arts and Culture, “U Tirot Sing” bad “Ki dohnud shlur bad ki nongïaleh laitluid na ki lum.”

Ha kane ka prokram la wan shim bynta da ki heh sorkar, ki pulit, ki cadet ka NCC, bad ki self help group.