Thaw u MDC da ka Meghalaya Chamber of Commerce ban lute
Shillong, Nailar 23 : Ki Pulit ka West Garo Hills kila ioh kyndang mynta sa ia ka kam khrong pisa jubor jong u Vice President ka BJP bad MDC ka GHADC Bernard N Marak uba dang don ha ka along nar, na ki nongkhaii ha sor Tura, kaba lam sha ka jingkiew dor ki mar bam mardih bad kiwei kiwei.
Ki Pulit kila lap ruh ba une u Nongialam ka BJP ula thaw ia ka kynhun “Meghalaya Chamber of Commerce” ban lum pisa na ki dukan ha ka kyrteng ka bai long dkhot bad ka jingsiew bai bnai ba manla u bnai.
U Bernard N Marak u dang don mynta hapoh ka Police Custody kaba la iaid haduh 26 sngi hadien ba u shah kem halor ka jingioh kyndang ki Pulit ia ka ktem khaii met hapoh ka Farmhouse ba u pyniaid kaba la tip kum ka Rimpu Bagan, kaba lam sha ka jingioh kem haduh 73 ngut ki briew bad ioh pyllait ia 5 ngut ki Khynnah nalor ka jingioh kurup ia bun bah ki tiar pynbthei, ka ryntih bad khnam bad kiwei kiwei.
U Superintendent of Police ka West Garo Hills u Vivekand Singh Rathore ula pyntip ba ia kane ka kam u Bernard la lap da ka jingtohkit ba jar jar bala bthah da ka Police Headquarter halor ka jingujor ki paidbah iaka jingkiew dor ki marbam mardih ha Tura ba kynthup naduh ki biskit, ki soh, ki jhur, ki pylleng, ka doh bad kiwei kiwei.
“Ha ka jingtohkit, la lap ba ki Nongbylla sngi, ki Nongtrei bylla, ki nongpang bad ki riew paidbah salonsar kila mad ia ka jingeh na ka jingkiew dor u soh, jhur, pylleng, doh, jingbam thiang, biskit bad kiwei kiwei. La lap ba kane ka jingpynkiew dor ka dei kaba dang jia ha kine ki khyndiat bnai kaba la leh ruh halor ka jingbthah jong ki Nongkitkam ka Meghalaya Chamber of Commerce” ong une u Heh Pulit.
Kat kum ka jingong jong u, ka Meghalaya Chamber of Commerce ka dei kaba treikam hapoh ka jingbthah jong u Bernard N Marak ba khot sin u Rimpu bad la iarap da kiwei pat ki briew kiba la tip kyrteng u Wilver Dango M. Marak, Anish M. Sangma, Patcheng T. Sangma bad kiwei kiwei.
“Kane ka Seng la lap ba kala lum bun bah ka pisa na ki nongshong dukan ha ka kyrteng ka jingrung dkhot bad ka bai bnai ba manla u bnai” ong une u Heh Pulit haba pyntip ba na kane ka jingpynkiew dor ia ki marbam, ia ka commission la sam hapdeng kine ki Nongkitkam ka Meghalaya Chamber of Commerce (MCC).
U Vivekand Singh ula ong ba nalor kine ki kam, kine ki Nongkitkam ka MCC ki ju byrngem ruh ia ki nongkhaii bar jylla ka thain ba ki dei ban ioh ia ka “No Objection Certificate” na u Bernard N Marak uba dei u MDC ka GHADC lem kumta kin ym ioh pynthymmai shuh ia ki Trading Licence. “ Bun bah ka pisa la shu lute na kine ki Nongkhaii ban ioh ia kane ka Certificate kaba long beain” ula ong.
Haba pyntip ba hadien kine ki jingshem, ka Ophis kala lum ia ka jingialang bad ki Nongshongdukan ha ki khyndiat sngi ba la leit noh ban pynbeit ia kane ka kam, u Vivekand Singh “Ka Sweets and Confectionaries Association of Tura kala rai ban pynhiar biang ia ka dor ki marbam thiang bad jingbam dihsha na ka bynta ka jingmyntoi u paidbah”.
Une u Heh Pulit u pyntip ba ka jingiakren bad kiwei ki Nongshongdukan bad ki Association ka dang iaid shakhmat ban lah pynhiar biang ia ka dor ka mur jong ki mar ki mata.
Une u Heh Pulit u pyntip ba halor ki kam jong ki Nongkitkam ka Meghalaya Chamber of Commerce, ki Pulit kila ujor ejahar ha Tura Police Station kat kum ka Case No. 189(08)2022 hapoh ka kyndon 120B/384/417/419/420/467/468/471 IPC.
“Ka jingtohkit mynta kala iaid shakhmat bad ngin pynthikna ba ki Pulit kin sa shim ia ka sienjam ba dei ban shim kat kum ka lynti jong ka ain” ula ong.
Une u Heh Pulit u pyntip ruh ba ka Tnad Pulit kala lap ba ki don ruh ki briew kiba dawa pisa na ki supplier mar ha ka kyrteng ka bai ai jingiada ne protection money. U iathuh ba kine ki briew ki pynbor ia ki nongshongdukan ba kin thied ia ki mar na ki supplier ba ki jied ha ka dor bala buh ma ki.
“Hadien ba ngi la ioh lum ia baroh ki sakhi, ngin sa leh ia kaei kaba dei ban leh” ong une u Heh Pulit haba pyntip ba ki Pulit kin ym ailad satia ia kino kino ki briew ban pyniaid ia ka iew ka hat da kaba thaw ia ki cartel, hoarding ne iewdie black.
Une u Heh Pulit ula kyntu ia ki paidbah ka sor Tura ba kin ai ka jingiatreilang bad ki bor District ha kaban lah ratdyngkhong ia kine ki kam beain. “ Iarap ia ngi ban iarap ia phi” ula pynkut.
