Shillong, Jymmang 03 : Ka Voice of the People Party (VPP) kaba ialam ia ka Executive Committee ha Khasi Hills Autonomous District Council, kala kyndang bad behkam ym ia ki nongtrei Casual hynrei ia ki nongtrei bala thungkam pura (Permanent) da ka Executive Committee barim.
Kine ki lanot kiba don kumba 27 ngut, kynthup ia kiba la shah behkam syndon bad kiba shah pynhiar kyrdan na ka jinglong Nongtrei ba pura sha ki Nongtrei Casual, hynne ka sngi Ba-ar kila leit pan jingpynshai na u Chief Executive Member (CEM) Bah Shemborlang Rynjah hynrei phewse kila ioh da ka jubab ba ka dei ka rai jong ka EC bad ka EC kam lah leh eiei shuh ia ki.
Ka jingleit iakynduh jong kine ki Nongtrei ba shah behkam ka long eh ban kyrpad ia u CEM ba un pyrkhat thymmai biang ia ka rai jong ka EC bad ban thung biang ia ki ha ka kam ba ki trei.
“Ngi la kyrpad ia u CEM…ngi la iathuh ia ki jingeh jong ngi, ki jingeh ban pynbit pynbiang ia ka iing ka sem, ki ram kiba ngi shim na ki Bank bala ai NoC da ka Ophis ban thied jaka ban shna iing bad ter ter..kumno shuh ngin lah siew ia ki? Hynrei ka jubab na u CEM ka long beit ba ym don lynti shuh ia ki da kumwei pat” ong ki nongtrei kiba la ialum lang ha phyllaw ka KHADC.
Jan baroh na kine ki nongtrei ba shah beh kam ha ka EC ka VPP ki dei ki Nongtrei Casual kiba la trei la palat 5-6 snem hapoh ka Council bad ka Executive Committee ka NPP bad Congress kala thungkam pura noh ia ki ha u snem 2024 hadien ka jingbishar ia ki jingshakri ba kila ai ia ka Council.
Kine ki Nongtrei ki dei kiba trei ha ki tnad bapher bapher hapoh ka Council ba kynthup ia ki constable ka tnad Enforcement, ka tnad Forest, Professional Tax bad kiwei kiwei.
Haba iakren bad ki nongthoh khubor, kine ki nongtrei ba shem apot kila pyntip ba ka Executive Committee kala shu pynmih hukum syndet syndet bad ia kine ki hukum, la ai sha ki hapdeng ka kam da ki Ophisar na ki Tnad ba ki don.
Haba kylli, kine ki nongtrei kila pynpaw ba ka lynti ia ki mynta ka long satang ban pynlong ia ka jingiakhih ha phyllaw jong ka Council bad ka jingleit mudui da ka mukotduma sha ka Iingkashari ban pan ia ka jingbishar kaba hok.
“Ngin sa iashong bad iakren para ma ngi shuwa ba ngin shim ia ka rai kaba dei ban shim” kila ong.
Lah ban kdew hangne, kum kane ka jingiakyndang briew (nongtrei) ha KHADC ka dei kaba ju jia beit ha man ba don ka jingkylla ha ka synshar khadar khamtam haba shimti da kiwei pat ki seng sain pyrthei ban pyniaid ia ka Executive Committee (EC).
Kane ka jingkyndang nongtrei ka dei ka raibi bala iaid da ki phew phew snem hapoh KHADC. Ki EC ba thymmai ki ju kyndang tang ia ki nongtrei casual ban ioh thungkam bujli pat dala ki jong ki briew lajong, ban pynhun iala ki nongkyrshan ne nongthep vote ne ki bahaiing hasem. Bad kam pat ju jia satia ba ki EC barim kin weng kam ia ki Nongtrei kiba la dep thungkam pura.
Ka jingkylli ka mih mynta halor ka jingthmu jong ka VPP ban kyndang ia kine ki nongtrei bala thungkam pura…hato ka VPP ka thmu ban pynkhuid ka raibi-ka jingthungkam sopsop hapoh ka Council, ka jingthungkam tang ia ki briew ki riewsain pyrthei ne bahaiing hasem bad ban pyniaid noh ha ka lynti kaba dei ha ka jingthungkam thungjam….?
Baroh ki iohsngew bad iatip ba ka VPP ka kam ba ka ieng ha ka nongrim ban wanrah ia ka synshar khadar kaba khuid, ban kyndang lut ia ki kam jaboh jabain, ki jingthungkam bymhok, thungkam da kaba jied bahaiing hasem ne paralok parajor hynrei ki kam kiban jia ha KHADC kin sa pyni la kane ka nongrim jong ka VPP ka dei kaba shisha ne ka dei tang ka nia/jutang pynbiej paidbah ha ka por elekshon?.
 kaba ialam ia ka Executive Committee ha Khasi Hills Autonomous District Council, kala kyndang bad behkam ym ia ki nongtrei Casual hynrei ia ki nongtrei bala thungkam pura (Permanent) da ka Executive Committee barim.){kind=link}