Guwahati, Nailar 26 : Uwei u nongtong dohkha ula shah siat iap ha ki shipai BSF kiba iaid pahara ia kaba la kynnoh ruh ba kila nang tharai ba u dei u nongkhaii tuh ha ki bynta khappud ka India-Bangladesh ha South Salmara district ka thain sepngi ka Assam.
Ia une u nongtong dohkha ba la shah pyniap la tip kyrteng kum u Maniruzzaman. Katkum ki trai shnong la ithuh ba kane ka jingjia kala jia ha ka miet sngi Balang ba la lah hapoh ka shnong Gudoli, kata ha ka por ba u Maniruzzaman u dang leit ban pynap ia ka jar tong dohkha, ong ki trai shnong.
Une u nongtong dohkha uba la mynsaw jur na ka jingdei kuli u la khyllem bad khlad noh ha ka lynti ban leitphai sha la iing, ong u Deputy Superintendent of Police (Border) ka South Salmara, u Saifur Ali lyngba ki lad pathai khubor.
Na ka liang ki nongshong shnong kila kynnoh ba dei ki shipai BSF kiba la ther kuli bad kaba la wanrah ia kane ka jingjia ba sngewsih.
“Watla katta na ka liang ki shipai BSF kim pat shym la pdiang satia ba ia kane ka jingther kuli la leh da ki dkhot jong ki.Ngi dang pynlong ia ka jingtohkit halor kane ka jingjia da kaba bishar bniah na baroh ki liang,” ong utei u heh pulit.
Katei ka jingjia shah siat iap kala pynmih ka jingiakynad kaba jur hapoh ka district bad na ka liang ki bor pulit kila pynjur ia ka jingpahara ha ki shnong khappud, ong ka khubor pulit.
Na ka liang ki heh ka district kila kam ba ka lah ban dei ka jingithuh bakla jong ki shipai BSF da kaba nang tharai ba utei u nongtong dohkha u lah ban dei u nongkhaii tuh.
