Bongaigaon, Nailar 26 : “Ngim kwah satia ban dang phiah ia ka Assam. La kalong kumno kumno ruh ngi ieng pyrshah halor kano kano ka jingpyrshang ban phiah biang ia ka Assam,” ong u MLa ka 32 Bongaigaon LAC hynnin ka sngi Palei haba jubab ia ka jingpynpaw jong u Ananta Ray Maharaj ba ka sorkar pdeng ka don ia ka jingthmu ban thaw ia ka jylla Kochbihar kaba thymmai ka ban kynthup ruh ia ki khyndiat tylli ki district jong ka Assam.
Ha ka sngi Balang ba la lah u Anata Ray Maharaj, uba dei u nong hiar pateng na ka longiing Syiem Kochbihar Maharaj, ula ong ba ka sorkar pdeng ka don ia ka jingthmu ban thaw ia ka jylla Kochbihar kaba thymmai ka ban pyniaid da ka sorkar pdeng ha ka ba khyndiat ki bynta jong ka Dhubri, Bongaigaon, Chirang bad Kokrajhar district kin shah kynthup lang.
Ula ong ruh ba ia kane ym thaw hashwa ka jingpynlong ia ka ilekshon sha ka dorbar parliament ha u 2024.Nalor kata ula ong ruh ba ia kane la pyntip sha u da u Myntri ka sorkar pdeng u Amit Shah.
Haba pynphai ia kane ka jingkren ka jong u, u Phani Bhusan Choudhury ula ong ba u long pyrshah halor kano kano ka jingpyrshang ban phiah biang ia ka Assam. “Ngam tip haduh katno kane ka jingpynpaw kalong kaba shisha. Hynrei Ngam kyrshan na ka bynta ban phiah biang ia ka Assam.
Nalor kata, u Maharaj ula kren ruh ha kaba iadei bad ka jingthaw ia ka jylla Kochbihar da kaba ong, ki nongshong shnong ki jong ngi ki dawa la ka jong ka jylla Kamatapur ym ka jylla Kochbihar.
Ha kawei pat ka liang, katto katne ki nongialam jong ka All Koch Rajbongshi Students’ Union kila pdiang sngewbha ia kane ka jingpynpaw jong u Maharaj.
