Shillong, Risaw 21: U Myntri ba khmih ia ka rep ka riang Timothy D Shira ula ai jingmut ban khot ia ki Saiantist ban pynlong ia ka jingkhmih bniah bad ban wad ia ki lad ki lynti ban iada ia ka jingbam khniang u kba bad ki dieng kwai hapoh ka jylla.
“Ngi dei ban iawer ia ki Scientist kiban khmih bniah bha ia kane ka jingjia ban lap ia ki daw bad ia ka lynti ban weng ia kane ka jingeh” la ong u Shira haba iakren bad ki nongthoh khubor hynne ka sngi Baar.
U Myntri ula ong ba ka jingpang ki diengkwai kala wanrah ia ka jingduh nong kaba khraw, ha kaba ki nongrep kila duhnong haduh T.20 Lak na ka 100 byrni u kwai.
U Shira ula pynshai ba na kawei ka bri kwai, u nongrep u lah ban khmih lynti ban ioh rep haduh 500 byrni u kwai. Hynrei namar ka jingpang, kane ka jingmih u kwai kala duna bad lam sha ka jingduh nong kaba khraw.
U Myntri ula ong ba ki ophisar ka tnad ka rep ka riang kin ym don ia ka jingtbit kaba paka ban iakhun ia katei ka jingpang.
Ula pynpaw ia ka jingdonkam ban don ruh ia ka jingtuklar ha ka jingrep kba, namar u kba ula shah pynjulor lut ha ki khniang.
U Myntri ula banjur ia ka jingkongsan ban ai jinghikai pyntbit ia ki nongrep ha ka rukom rep katkum ka juk stad science. Ula ai nuksa ba ha rilum Khasi, ki nongrep kiba la ioh ia ka jinghikai pyntbit mynta kila sdang ban heh ha ka jingioh kamai ka jongki namar ka jinglah ban pynmih bun bha.
Ula banjur ia ka jingdonkam ban don ruh ia katei ka prokram ai jinghikai ha rilum Garo, khamtam ia ka jingrep khlem pyndonkam dawai ne Organic Farming bad ka jingpyndonkam ia ka sboh kaba khlwm ai dawai.
U Shira ula ong ba haduh 75% na ka jingdon ki paid hapoh ka jylla Meghalaya kidei kiba shaniah ha ka rep ka riang bad ka long kaba donkam ban iada ia ka kamai kajih jong ki nongrep.
Ula kdew ruh shaphang ka jingioh jingmyntoi na ka jingrep khlem pyndonkam dawai bad ka jingpyndonkam ia ka sboh kaba khlem ai dawai kum ka eit masi kaba lah ban pynbha ia ka khyndew bad ban pynmih ia ki jingthung kiba shngain.
