Shillong, Risaw 21: U Myntri ka Tnad Jngohkai u Timothy D Shira hynne ka sngi ula ong ba ka kam jngohkai kala iaid bha shaphrang hapoh ka jylla Meghalaya.
“Ha kito ki sngi jong u snem 1965 haba nga lah leitkai sha Sohra (Cherrapunjee), ym don eiei hynrei mynta kila don bun ki jaka sah (Hotel) kiba bha bad bun ki briew kila kylla long riewspah bad kila tei ia ki jaka sah kiba bha” ong u Shira haba iakren bad ki nongthoh khubor.
Katkum ka jingong ka jongu, ka kam jngohkai kala kylla long ka lad kamai jakpoh ia ki trai nongshong shnong ha kaba bun ki briew kila ioh jingmytnoi bha na kane ka kam.
U Myntri ula pyntip ba ka sorkar kala shim ia ki sienjam ban pyniar noh ia ka kad liengsuin ha Umroi, kaban iarap ia ki liengsuin kiba heh ba kin ioh ban wan hiar bad ban wanrah bun ngut ki nongjngohkai sha ka jylla.
Ula kdew ruh ia ka jingthmu ban pyniar noh ia ka kad liengsuin ka Baljek Airport hapoh rilum Garo.
U Shira ula pynapw ia ka jingkongsan ban kyntiew iak I ald pyniasoh.
“Shisien ba la dep tei ia ka jingkieng ha ka wah Brahmaputra kaba don ha Phulbari, kan pyniasoh ia ka Meghalaya bad ka jylla Mizoram, Tripura, Manipur, bad ki bynta jong ka jylla Assam.”
U Shira ula pynpaw ruh ba ki tamasa kiban sa pynlong kiba kynthup ia ka Cherry Blossom, Wangala bad Megong Festival bad ula pynpaw ia ka jingthmu ban wad ia ki lad ki lynti ia ki jaka kiba thymmai bad ban kyntiew ia ki jaka jngohkai kiba la don lypa.
Ula banjur ia ka jingkongsan jong ki Homestay ha ki thain nongkyndong, kiba lah ban ai jaka sah ia ki nongjngohkai bad kan ai jingmyntoi ia ki nongshong shnong.
U Myntri ula banjur ia ka jingdonkam abn kyntiew ia ki jingtei kiba iadei bad ka kam jngohkai kaba kynthup ia ka jingpynbha ia ki bynta kiban khring ia ka krem Siju.
Ula ai nuksa ba ka kam jngohkai lyngba ka jingrung ia ki krem ki kroh ha kiwei pat ki ri, ha kaba ki jingtei ia ki kam pynroi kala pynlah ia ki nongjngohkai ban jngoh ia ki krem da ka jingshngain bad da ka jingkmen.
