Shillong, Naiwieng 4: U Myntri Sorkar uba khmih ia ka tnad Arts and Culture u Bah Sanbor Shullai ula ban jur ia ka jingdonkam ban don ia ka ia ka roi ka par kaba salonsar bad kaba iai neh kaban iaid ryngkat bad ka jingiada ia ka mariang.
Haba kren ha ka workshop halor ka Hill Regions Planning Initiative (HCRPI) ban thaw ia ka rukom treikam ban pynneh pynsah, kaba lah ban kyrda ia ka suinbneng bad ka jingkiew ka ioh ka kot ha ki nongbah kiba don ha rilum, u Bah Sanbor ula ong, ba ki nongbah ha rilum kidei kiba la kyrkhu kyrhai da ka jingdon jingem bad ka kolshor kaba bun jait hynrei kila mad pat ia ka jingeh kaba khraw na ka jingdon ia ki riat ki ram, ki jingtei bad ka jinglong jingman ka suinbneng.
Ula ong, ba kane ka sienjam kadei ka jingkdew lynti ban don ia ka roi ka par kaba neh bad kaba salonsar, hapoh ka jingialam u Myntri Rangbahduh ka ri u Narendra Modi bad ong ruh ba kane ka jingialang kadei ka kabu ban pynwandur ia ka lynti iaid ban jam sha ka rukom treikam kaba thymmai ha kaba iadei bad ka roi ka par kaban don ia ka jingkiew ka ioh ka kot bad ka jingiada ruh ia ka mariang, ban kyntiew ia ka jingsengkam ki trai shnong, ka kam jngohkai kaba iadei bad ka mariang bad ban pynkup bor ia ki samla.
Ula pynpaw ba ka “Meghalaya ka don ia ka jingngeit naduh ki por hyndai ba ka roi ka par bad ka maraing kidei ban iaid lang bad kum ka ri ka iaid halor ka nongrim jong ka Viksit Bharat @ 2047, ngi dei ban pynthikna ba ki thain rilum ki jong ngi kim dei ban shah ieh shadien”.
Ia kane ka jingialang la pynlong da ka NITI Aayog ha ryngkat ka jingiatreilang bad ka sorkar Meghalaya bad kane ka jingialang kala lum lang ia ki heh ophisar sorkar, ki nongthaw polisi treikam bad ki riewstad ban buh hakhmat ia ka jingkyntiew ia ka ioh ka kot ryngkat bad ka jingiada ia ka mariang.
Haba kren maitphang, u Vijay Kumar D u Commissioner and Secretary ka Urban Affairs Department, ula ong ba kane ka sienjam ka long ha ka por kaba biang bha bad ula batai bniah ia ka jingiohi jngai jong u Myntri Rangbah ka jylla Meghalaya ban long kum “Kawei na ki Jylla ha ka Top 10 hapoh ka ri India ha u snem 2032”. Ula batai ruh ia ka jingbuh thong ka sorkar na ka bynta ki 10 snem ban wan, kaba la sdang ha u snem 2022 da ka jingthmu ban pynurlong ia ka Viksit Meghalaya da kaba kyntiew ia ka GDP, SDG bad ban pynbha bad pynsuk shuh shuh ia ka rukom im.
Ula ong “Ki mat kiba kongsan ki long ba ka sorkar jylla kala buh ia ka sor kum kawei na ki Top 10 kaba ka jylla ka kwah ban pynleit jingmut bha” bad ka ong ba ka rukom pyrkhat ka jylla kala sdang iaid shakhmat halor ki katto katne ki mar kiba la bteng ban pynkhlain ia ka rukom synshar khaddar ha ki jaka sor.
Ka Anna Roy, Principal Economic Adviser & Programme Director jongka NITI Aayog, kala pynshai ba kadei ka sienjam kaba kyrpang hapoh jong ka NITI Aayog’s “State Support Mission” da ka jingthmu ban thaw ia ka rukom treikam kaba shai kdar.
Ka Roy kala batai ba ka rukom treikam jongka NITI Aayog na ka bynta ki jaka sor ha ki jaka kiba long ri thor, kaba ithuh ba ki jaka rilum ki donkam ia ka rukom treikam kaba da kumwei pat namar ka jinglong kyrpang ka jongki.
U Som Kamei, Planning Adviser ka NEC, ban ithuh ia ki jaka sor ka long kaba kongsan bha ban ialam shakhmat ia ka roi ka par bad ula pynpaw ruh ia ki jingeh kiba kyrpang ha ki nongbah sor kiba thaw ia ki jingeh ha kaba iadei bad ka jingroi jong ki nongshong shnong.
Ula iengskhem ba ka NEC kan ialeh ban pynthikna ba kane ka jingiatai kan long shi bynta jong ka Vision 2047 bad kan iatreilang bad baroh kiba donbynta lang ha ka kam ban wad ia ki lad ki lynti ban pynneh ryntih ia ka jingkiew ha ka roi ka par.
Haba kren ha ka bynta kaba nyngkong u Jagan Shah, CEO jongka The Infravision, ula kdew ia ka rukom leh kaba biang tam da ki nongbah sor bad ithuh ruh ia ki jingeh ha kaba iadei bad ki jingtei, ka iaid ka ieng bad ka jingpyndonkam ia ki jaka. Da kaba pyndonkam ia kitei ki bynta ha ka Meghalaya, ula pynpaw ruh ia ki mat kiba kongsan ba dei ban shimkhia bha kum ka kam jngohkai kaba iadei bad ka mariang, ka jinglah kyrda na ki jingjulor bad ka jingpyrkhing ia ki jingtei.
Katba u Dr. Uday Bhonde, Sr. Program Specialist, NIUA, ula pynpaw halor ki sienjam kaba kynthup ia ka ‘shallow aquifer management project’ bad ki rukom treikam kiba iadei bad ka suinbneng bad ka mariang.
U Snehit Prakash, Regional Director, Borda Asia, ula batai shaphang ki rukom treikam ha kaban ai jingshakri kiba lah ban kyrda ia ka jinglong jingman ka suinbneng, ka jingsam mar kylliang ia ka jingnang jingstad bad kiwei kiwei.
Hadein ka bynta kaba nyngkong, u Prof. Arup Sarma, IIT Guwahati, ula kren halor ka jingleh ia ka jingkhmih bniah bad batai shaphang ka Sustainable Accommodation Framework kaba pynleit jingmut ha jingpule bniah ia ki jingjia kiba seisoh bad banjur ia ka jingmut jingpyrkhat ha kaban pynneh ia ki jinglong jingman ki jaka sor ha Meghalaya.
Ka Prof. Mahua Mukherjee, HoD, Dept. of Architecture and Planning, IIT Roorkee, kala kren ha kaba iadei bad ka jingiaishah jongka imlang sahlang kum ka bynta ha kaban kiew shaphrang bad kala kren ruh halor ka ki paia kiban iarap ia ki nongshong shnong ban ithuh ia ki jingthmu bad ban iaid shakhmat ka jingpynneh pynsah bad bad iashimbynta ha kaban wan ia ki lad ban pynbeit ia ki jingeh.
Katba u Tikender Singh Panwar, Deputy Mayor barim ka Shimla, ula kren halor ka synshar khaddar, ki polisi treikam ki bynta kiba iadei bad ka jingbei tyngka bad kiwei kiwei ki mat kiba iadei bad ka kam pynroi ha ki jaka rilum.
Kane ka jingialang kala kut da ka jingiasyllok lang da kaba pynshong nongrim ha ka jingithuh ia ki mat wad bniah kiba kongsan, ban ia sam ia ki jingtip bad jingnang jingstad ban plie lad ia ki jingmut jingpyrkhat ban kyntiew ia ka roi ka par bad kiwei kiwei.
