Shillong, Risaw 29 : U Myntri ka Koit ka Khiah Bah Wailadmiki Shylla ha ka sngi Ba-ar ula pynpaw ia ka jingkmen lada lah ban wanrah ia ka medical college ha Jowai hynrei ula ban jur pat ba kane kam dei satia ka kam kaba suk.
U Bah Wailad, uba la long MLA la arsien na Jowai Constituency, ula ong ba un dei u briew uba kmen eh lada lah ban seng ia ka medical college ha Jowai hynrei ula pynpaw pat ba ki don shibun ki kyndon kiba hap ban pyndep.
“Khlem pep, ngan dei u briew uba kmen eh lada ka medical college ka wan ha Jowai, hynrei ha kajuh ka por ngi hap pat ban sngewthuh….ban plie ia ka medical college kam dei kaba suk. Ngi don shibun ki kyndon kiba hap ban pyndep” ula ong haba iakren bad ki nongthoh khubor.
U Mntri ula kren ruh halor ka jingiaid ki kam ba iadei bad ka jingseng ia ki medical college haba pynpaw ba san snem mynshuwa, ka Meghalaya kam don satia wat tang kawei ka medical college hynrei mynta kala don haduh lai tylli.
Ula ai burom ia kane ka jingkiew ka Jylla sha ka jinglong nongialam u Myntri Rangbah bad ka Myntri barim ka Koit ka Khiah.
U Bah Wailad ula pyntip ruh ba dang shen ka Sorkar kala pynbna ban seng ia ka nursing college ha Jowai.
