Shillong, May 31: U President ka Voice of the People’s Party (VPP) bad MLA ka Nongkrem Constituency bah Ardent Miller Basaiawmoit hynne ka sngi Balang, ula rai ban bteng iaka jingshah thngan tad haduh baka sorkar ka pynmih iaka jingpyntip (Notifcation) bala thaw iaka Expert Committee ban bishar biang iaka State Reservation Policy.
Ia kane la pyntip da General Secretary ka VPP u Dr. Ricky Syngkon hadien bala wai ka jingialang jong ka Committee on Reservation Roster bad Reservation Policy bala khlieh daka Myntri ka tnat Law kong Ampareen Lyngdoh.
U Bah Ardent ula pynbna ruh da lade ia kane ka juh ka rai sha ki paidbah hadien ka jingioh ktien ia kaei kaba mih na ka jingialang jong ka Committee ki seng sain pyrthei kaba iatai halor ka Reservation Roster bad Reservation Policy.
Kane ka Committee kala rai ban phah ia ka jingtyrwa sha ka Sorkar Jylla ba kan thaw da ka Expert Committee ne ka Committee ki stad ki jhad, ki ban shong bishar thymmai ia ka State Reservation Policy.
Haba kren sha ki lad pathai khubor u ba Dr. Ricky Syngkon ula iathuh baha ka jingialang ka Committee kala mynjur iaka jingai jingmut ja VPP ban thaw noh daka Expert Committee ban bishar biang iaka Reservation Policy.
U Dr. Ricky Syngkong ula ong “Ngi lah ban ong ba ka jingialang jong ka Committee ka long kaba seisoh namar ka sorkar kala mynjur ban thaw daka Expert Committee kumba la dawa ka VPP hynrei u bah Ardent un iai bteng iaka jingshah thngan tad haduh baka sorkar ka pynmih iaka jingpyntip (Notifcation) bala thaw iaka Expert Committee ban bishar biang iaka Reservation Policy”.
U Dr. Ricky Syngkon ula iathuh ruh baha ka jingialang baroh ki sengsain pyrthei kiba don haka Committee kila mynjur da kawei ka sur ban thoh shaka sorkar ban thaw daka Expert Committee haka jingdon lang ki stad ain bad ki Constitutional Experts ban bishar iaka Reservation Policy.
Ula ong iathuh ruh baha ka jingialang, ka Committee kala bthah ruh iaki nongialam sengsain pyrthei ban phah iaki jingai jingmut hapoh ka 15 tarik Jylliew bad halor ka jingpyntreikam iaka Roster System bad halor ka Reservation Policy bad hadien kane ka Committee kan sa shong biang ka jingialang ban pyrkhat kumno ban iaid shakhmat.
