Shillong, Jylliew: Ka Sorkar Jylla lyngba ka Tnad Forest & Environment, kala buhthong ban pyndep noh hapoh une u snem ia ka State Zoo kaba don ha Umtrew,Ri-Bhoi Distrct bad ban pynkynriah noh ia baroh ki mrad bad ki sim kid oh kiba don ha Phan Nonglait Park, kaba ju tip kum ka Lady Hydari Park, Shillong.
“Ka jingtei jong ka State Zoo ha Umtrew ka dang iaid shaid shaid mynta bad la khmih lynti ba ki Contractor kin pyndep noh shen ia kane ka project” ong u James PK Sangma, Myntri ka Tnad Forest ka Jylla
“Ngi kyrmen ba ngin sa ïoh ban plie noh shen ïa ka namar ka jingpyntrei ka la ïaid stet bha. Ngi kwah ruh ban pynkynriah lut noh ïa baroh ki mrad bad ki sim na Phan Nonglait Park sha ka State Zoo,” ula bynrap.
U Myntri u ong ruh ba ka jingbuh ïa ki mrad ha ka Lady Hydari ka long kaba isangsot bha namar ka jingrit palat ki jaka bad ka jingbym lah leh eiei ka sorkar ka dei namar ba kam pat don lad shawei.
Ha kawei pat ka liang u Myntri u la ong ruh ba tad haduh mynta hi kim don kano kano ka jingthmu ban wanrah kham bun shuh shuh ki mrad sha katei ka jaka ri kaba thymmai lait noh na kito kiba dei na ka Phan Nonglait Park.
Shuh shuh u la ong ruh ba hadien ba la dep ban pynkynriah lut ïa ki mrad na katei ka park, ka sorkar kan sa phah pynpra lut ïa ki jingtei kiba don ha ka Park khnang ba yn dup lah pat ban pynwandur ïa ka kum ka jaka ïaid kai ne shongkai pyngad jong ki paidbah.
