Nongpoh, Nailur 02: Ka Ri Bhoi Dorbar mynta ka sngi ka la pynpaw ïa ka jingkmen kaba khraw ba u Myntri Rangbah ka jylla Conrad K Sangma u la kular ban pynurlong noh kloi ïa ka jingangnud ki paidbah ka Western Ri Bhoi ha ka ban kyntiew kyrdan ïa ka Patharkhmah Administrative Unit sha ka Civil Sub Division.
U Conrad K Sangma u la pyntip paidbah ba ka sorkar jylla ka la bishar bniah iaka jingdonkam ban kyntiew kyrdan ïa ki Administration Unit bad ban thaw ruh ïa ki Community Rural Development Block ha kaba ka Patharkhmah ka dei kaba nyngkong ban ïoh ka Civil Sub Division.
Ha ka jingïalang ba kyrkieh jong ka Ri Bhoi Dorbar ba la pynlong ha Umsning hynne ka sngi thohdieng, u Bah R.B Shadap kum u President, u la pynpaw ïa ka jingkmen kaba khraw ban tip ba ka sorkar MDA ka la don ha ka lynti ban kyntiew kyrdan noh ia ka Patharkhmah sha ka Civil Sub Division.
“Ka jingdawa ban kyntiew kyrdan ïa ka Patharkhmah Administrative Unit kaba la don kumba 33 snem snem, kaba dei ka jingdawa jong ka Ri Bhoi Dorbar kaba la bun phew snem. Kane ka Administrative Unit kala don hok ban shah kyntien kyrdan noh” ong u Bah Shadap haba iakren bad ki nongthoh khubor.
U Bah RB Shadap, u la pyntip ruh ba khnang ba kane ka kam kan kham stet, ka Ri Bhoi Dorbar kan sa leit ban buh ïa ka dorkhassha u Myntri Rangbah ka jylla Meghalaya ban kyrpad ha kaban kyrkieh noh ia kane ka kam.
“Ka Ri Bhoi Dorbar ka ai ka jingkhublei ba kyrpang ïa u Myntri Rangbah ka jylla Conrad K Sangma ba u la kren shai ba ka Patharkhmah ka la dei hok ban ioh” ula ong.
