Imphal, Nailur 02 : Kila don haduh kumba 68,000 ki nong aplai na ka thain shatei lammihngi (Northeast) jong ka ri kiba la rejistar ialade na ka bynta ban ioh rung ha ka kam shipai ‘Agniveer’ lyngba ka skhim ‘Agnipath’ jong ka sorkar pdeng kaba dei na ka bynta ka jingshakri kaba tang khyndiat por hapoh ki tnat shipai, ong u nongaiktien ka tnat shipai hynnin ka sngi Palei.
U nongaiktien ula ong ba ka jingpynrung kyrteng na ka jylla Meghalaya, Manipur, Nagaland, Arunachal Pradesh bad na ki 13 tylli ki district ka Assam la pyndep ha kine ki khyndiat sngi ba la lah.
“Ka jingphaikhmat sha kane ka rukom pynrung kam shipai kala long kaba jop ha kaba kila don haduh kumba 68,000 ngut ki nong aplai kiba la rejister ialade ban iashim bynta ha ki hynriew tylli ki rally,” ula ong.
Nalor kata u nongaiktien ula ong ruh ba ka jingrejistar napoh Mizoram, Tripura bad ki 20 tylli ki district ka Assam mynta ka dang iaid shakhmat bad ia kaba yn khang noh lashai ka 3 tarik Nailur 2022.
Shuh shuh ula ong ruh ba ka jingrejistar na ka bynta ki shipai kynthei na ka bynta ka tnat Corps of Military Police jong ki hynniew tylli ki jylla ka thain Northeast ruh kala iaid shakhmat naduh ka 9 tarik u Nailar ba la dep bad ia kaba yn pynkut ha ka 7 tarik mynta u bnai.
