Shillong Kyllalyngkot 08: Ka Nongialam ka NPP bad Myntri Sorkar Kong Ampareen Lyngdoh, hynne ka sngi Nyngkong kala ong, ba ka NPP ka iengskhem ban ai jingmut ia ka Sorkar Jylla ia ka jingdonkam ban pyniaid shakhmat ia ka jingiakren iasuk bad ka kynhun kieng atiar bala kheiñ be-aiñ-ka Hynniewtrep National Liberation Council (HNLC).
Haba iakren bad ki nongthoh khubor, ka Kong Ampareen kala ong, ba watla ka la don katto katne ka jingbym hun bad ka jingbym sngewthuh jingmut hynrei ia kine kiei kiei baroh donkam ban da pynshisha shwa.
“Kane ka mat kadei kaba hap hapoh ka jingkhmih jong u Symbud Myntri Rangbah ka jylla uba khmih iaka Kam Pohiing hynrei mynta um lait ban shimkhia ia kane ka mat kaba kongsan hynrei ka seng NPP ka iengskhem ha ka nongrim ban ai jingmut ia la ka sorkar ba kan pyniaid shakhamt bad jingiakren iasuk” kala ong.
“Ngi sngewthuh ba kila don ki jingbym hun bad jingbym sngewthuh jingmut bad ia kine baroh donkam ban da pynshisha shwa bad ngin ap ia u Myntri Kam Pohiing ba yn wanphai noh shen sha ka jaka treikam khnang ba yn lah ban ai ia ka jingbatai kaba bniah” kala bynrap.
Ka kong Ampareen kala ong “Nga pynthikna ba kum ka seng (NPP) bad kum ka Sorkar, ngi iengskhem ha ka nongrim ba ngi kwah ban pyniaid shakhmat iaka jingiakren iasuk bad katei ka kynhun kieng atiar kaba la shah kheiñ be-aiñ bad ngi kwah ban iohi ba kadei ban don ka jingia sngewthuh jingmut lang na ka bynta ka jingiakren iasuk kaban neh shi rta, hynrei ngam lah ban batai than halor kane ka mat”.
Kum ban shu kdew, dang shen ka HNLC kala pynbna ba kala weng noh na ka jingiakren iasuk bad kasorkar Pdeng bad ka sorkar jylla hynrei kan bteng iaka jingiakren iasuk tang lada ka sorkar ka map noh ia ki case kiba la pynngat pyrshah ia ki dkhot jong ka seng.
.){kind=link}