Shillong, Lber 30 : Ka Indian National Congress (INC) ka la khmih lynti ia ka All India Trinamool Congress (AITC) ba kan tyrwa ha kaban iatreilang kum ka Liang Pyrshah kaba iatylli ha ka Iingdorbar Thaw Ain ka Jylla.
U Nongialam ka Congress Legislature Party (CLP) Bah Ronnie V Lyngdoh haba iakren bad ki nongthoh khubor, ula ong ba ka la paw shai ba donkam 10 ngut ki MLA ban thung ia u Nongialam ka Liang Pyrshah hynrei ym don napdeng ki lai tylli ki Party ba don ha ka Liang Pyrshah kiba don 10 ngut.
Lah ban kdew hangne ba ka Congress ka don tang 5 ngut ki MLA, ka AITC ruh ka don 5 ngut ki MLA bad ka VPP ka don tang 4 ngut ki MLA.
“Don kiba la kylli ia nga balei ba ym iatreilang bad ka TMC hynrei kane ka jingtyrwa bad ka jingkyrpad ka dei ban wan na ka liang ka jong ki” ong u Bah Ronnie haba bynrap “Lada don kum kane ka jingkyrpad (na ka TMC), ngi ruh ngim dei ban shu buh ia ka jingtyrwa”.
Kat kum ka jingong une u Nongialam ka CLP, kane ka long namar ba ka Congress kam shym la iatreilang bad ka TMC ha ka Iingdorbar ha Parliament.
“Ngi khlem iatreilang bad ki hangne. Hynrei, lad aka jingkyrpad ne jingtyrwa ka wan, ngin sa shong pyrkhat ia ka” ong u Bah Ronnie.
Haba kylli, une u Nongialam ka Congress ula kyntait ban kubur ba ki Party ba don ha ka Liang Pyrshah ki dei kiba tlot haba khmih ia ka jingbym iatylli hapdeng jong ki hapoh ka Iingdorbar bad ong “Phi la iohi ha ka Dorbar ba dang shu dep, ngi la wanrah ia shibun ki ishu ka Jylla wat hapdeng ka jingbym don u Nongialam ka Liang Pyrshah”.
Ha kajuh ka por, u Lamphang ka Iingdorbar Thaw Ain Thomas A Sangma, u dang iasyllok halor ka kam thung Nongialam ka Liang Pyrshah shuwa ban shim ia ka rai ba khatduh.
