Shillong, Nailar 12: Ka IIM Shillong Umsawli haka jingiatreilang bad ka Martin Luther University, ICFAI, Royal Global University Guwahati, Shillong Law College, Down Town University Guwahati and Bajoria Group of Institutions hynne ka sngi kala pynkut iaka Symposium ba arsngi halor ka mat “Community Based Tourism in North-East” naka bynta ki briew, ki samla pule bad ki kynhun kiba don bynta ban kyntiew iaka kam jngohkai pyrthei.
Ia kane ka Symposium la pynlong naka bynta ban iasam iaki buit haba iadei bad ka jingdonkam ban pynneh bad kyntiew iaki kam jngohkai pyrthei tynrai bad haka juh ka por ban kyntiew iaki shnong kiba pyniaid iaki kam jngohkai hapoh ka thain shathei lammihngi.
Ha kane ka jingiathir ba arsngi, u Director ka tnat Tourism u bah Cyril V. D. Diengdoh uba la batai iaka thong jong ka sorkar Meghalaya lyngba ka Meghalaya’s Progressive Tourism Policy ban kyntiew iaki kam jngohkai pyrthei khamtam ha ki jaka ba pyniaid daki bor shnong.
La ioh ruh ia ki jingkren na ki riew pawkhmat ba kynthup na u Ajit Kr. Paul u ba dei u President ba nyngkong ka Tripura Tourism Development Forum, u R.K Sharma u nongseng iaka Seven Sister Holidays, Dr. Sharad Kulshreshtha naka skulbah NEHU bad Prof. Achinta Kr. Sarmah na IIM Shillong.
Iaka jingiatai la lamkhmat da u Carmo Noronha u ba dei ruh u Secretary ka Bethany Society, Shillong, u Kenstonbel Manik Syiemlieh u ba dei ruh u bahaïing jong u syiem Tirot Singh, u Prof. Rohit Dwivedi naka IIM Shillong bad kine ki nongkren kila pynsngew halor ka jingdonkam ban don nongialam na ki bor shnong ban pynneh iaki tynrai kaba ki paidbah ki pyntreikam ban pynneh iaki jaka jngohkai pyrthei.
Haka sngi khatduh jong ka jingiathir la ioh ruh ia ka jingkren na u Bengia Mrinal jong ka Indian Association of Tour Operators Arunachal Pradesh, ka Elina Satpathy kaba dei ruh ka Co-founder of Seven Sister Holidays, ka Dasumarlin Majaw Founder jong ka Smokey Falls Resort, Meghalaya, u Tshring Wange Founder bad CEO jong ka Himalayan Holidays Arunachal Pradesh, ka Nino Zhasa kaba dei trai jong ka Morung Lodge Kohima Nagaland bad Prof. Sheetal na IIM Shillong.
Ia kane ka symposium la pynhap pyrda da u Myntri ki kam Jngohkai ka Jylla Bah Paul Lyngdoh uba la pynpaw ba ka jingriewspah ka jylla jaka jingdon jingem ka mei mariang kadei kawei ka daw ba ka kam jngohkai pyrthei hapoh Meghalaya kala kiew sted bha bad ka sorkar jylla lyngba ka Tourism Policy ka kwah ban nang pynkiew shuh shuh iaki kam jngohkai pyrthei daka ba pyntreikam iaki projek kum ka Community-Based Tourism.
Pule ruh: Ioh khusnam u Bah Ian Nongkynrih na ka jingthoh kot bad ka durim TV shisngi ‘Hala Shnong’
