Shillong, Naitung 22: Ka United Democratic Party (UDP) hynne ka sngi thohdieng kala pynpaw ba kam don satia ia kano kano ka jingthmu ba kan mih na ka Sorkar Meghalaya Democratic Alliance (MDA) ba ialam da ka NPP khnang ba ka Sorkar kan skhem bad neh haduh kaba kut ka samoi treikam.
“Ka UDP ka ju ngeit bad ieng ha ka nongrim ka jingiatylli bad jingskhem, kane ka dei kaba ngi ieng, ngi kwah ia ka sorkar kaba skhem, ngi kwah ba ka dei ban don ka jingiakitkhlieh lang ia kiei kiei baroh” ong u General Secretary ka UDP Dr Jemino Mawthoh haba iakren bad ki nongthoh khubor.
U Dr Jemino ula kren ia kane haba jubab ia ka jingkylli la ka UDP kan mih noh na ka Sorkar MDA namar ka jingmih jong kiba bun ki jingkynnoh bamsap pyrshah ia ka Sorkar kaba lah ban ktah ia ka UDP ha ka elekshon 2023.
Haba ai nuksa ia ki artylli ki District Council ka Jylla, u Dr Mawthoh ula ong “Phi peit ha KHADC hapoh ka jingialam u Bah Titosstarwell Chyne kum u CEM ka KHADC ka long kaba skhem, phi leit ha JHADC ruh kumjuh. Ta ka daw ngi kwah ban ban jur ia ka jingskhem”.
U Dr Jemino ula ong ba ha ka politics hi, phi lah ban iashrut man ka sngi kum ki miaw ki ksew hynrei kaeri kaba kongsan ka long ba kumno phin pynbiang tarajur bad kumno ban wanrah ia ka jingskhem.
