Shillong, Naitung 23: Ka Bharatiya Janata Party (BJP) kala dep ban ithuh haduh 35 ngut ki kyrtong ki ban aireng na ki 35 tylli ki Constituency ha ka elekshon MLA-2023 ha Jylla haba pyntip ruh ba ki don sa lai ngut ki MLA kiba kwah ban iasoh noh bad ka party hashuwa jong ka elekshon.
Haba pyntip ia kane hadien ka jingpyniaid ia ka jingialang jong ka State Executive Committee (SEC), u President ka BJP-Meghalaya Pradesh Bah Ernest Mawrie ula ong ba ka Party kala dep ithuh ia 35 ngut ki kyrtong ha ka thup ba nyngkong (first phase) ka ban don haduh lai bynta.
Ki don haduh 10 tylli ki Constituency kiba la buh ha ka kyrdan A, 20 tylli ha ka kyrdan B bad 15 tylli ha ka kyrdan C bad ia kine la buh kat kum ka jingiaid jurip jong ka Party, ula ong.
U Bah Ernest ula ong ba kala don ruh ka jingkyrpad na ki Nongkitkam ka Party, ki Dkhot bad ki President na ki District ban pynbna noh khamkloi ia ka thup kyrteng jong ki kyrtong ki ban aireng ha ka elekshon 2023.
“Ngin sa kyrpad ia ki Nongialam na Delhi hynrei ym kumba long kiwei ki party, kiba lah ban pynbna noh mardor ia ka thup kyrteng ki kyrtong, ngi te ngim lah satia namar ki don ki kyndon ba ngi hap ban bud” ula ong.
Haba kylli, une u President ka BJP ula iathuh ba lai ngut ki MLA kila dep iakren bad ka Party bad kila pynpaw ia ka jingkwah ban wan iasoh sha ka party hashuwa ka elekshon 2023.
“Ngim pat lah ban iathuh ia ka kyrteng jong ki hynrei kila dep ruh ban iakren bad ki Nongialam na Delhi bad ia nga kum u president ha Jylla..Hynrei, ngim pat shym la shim rai satia, nga tharai ba kan bha ba ngin ap ia ka por hadien ba kila wan iasoh bad ngi” ong u Bah Ernest.
Baroh arngut ka BJP kata u Bah Sanbor Shullai bad u Bah A.L.Hek ki khlem wan iashimbynta satia ha ka jingialang jong ka SEC. Halor kane, u Bah Ernest ula ong ba ka daw hi ka dei namar u Bah Hek u don shabar ka Ri bad ka Khun katba u Bah Shullai u dang don hapdeng ka jingsumar ha kawei ka Hospital hadien ka jingkem pang.
Haba iadei bad ka jingpynbna lypa jong ki katto katne ngut kum ki kyrtong ka BJP, u Bah Ernest ula ong “Ka jingkulmar jingmut kala mih mynta ha ki paidbah jonga ki katto katne ki Constituency namar ki don ki briew kiba la pynbna ialade ba ki la ioh ia ka ticket jong ka BJP lyngba ki briew na Delhi bad Guwahati…kane ka dei kaba bakla”.
Une u Nongialam u iathuh ba ka BJP ka don ia ki briew kiba kwah long kyrtong najan baroh ki Constituency hynrei kum ka National Party, ka hap ban bud ia ki kyndon ha kaban ai ia ka ticket jong ka party.
“Tad haduh bala pynbna ia ka elekshon, ngin sa khot thep kyrteng ia ki kyrtong bad ka State Election Committee kan sa phah ia kine ki kyrteng sha ka Central Election Committee kaba la khlieh da u Myntri Rangbah Duh ban ai ka jingmynjur” ula ong.
