Shillong, K’lyngkot 13 : U Chief Election Commissioner (CEC) Rajiv Kumar hynne ka sngi thohdieng ula ong baka Commission kala kut jingmut ban pynthikna ba ka jingpyniaid ia ka elekshon ha Meghalaya kan long kaba iaid suk, kaba shai bad kaba lait na kino kino ki jingpynngop.
“Ka Meghalaya ka dei ka Jylla kaba shongsuk bad ia ka elekshon la ju pynlong ha kata ka rukom kaba iasyriem bad ka jingleh tamasa ha ka riti synshar paidbah. Nga kyrpad ia ki nongshongshnong ka Meghalaya ban iashimbynta shitrhem ha ka elekshon” ong u Kumar.
U Kumar ha ryngkat bad ki Election Commissioner Anup Chandra Pandey bad u Arun Goel, kila wan arsngi ha Jylla ban twad jingmut halor ka jingpynkhreh jong ka Jylla ia ka elekshon MLA ka ban long ha u bnai ban wan.
Kine ki Kynhun n aka ECI kila iakynduh ia ki Nongialam jong ki Political party bad shim ia ki jingai jingmut bad ki jingtip nalor ka jingshong ia ka jingialang bishar kam bad u Chief Secretary, Director General of Police (DGP), ki District Magistrate, ki Superintendent of Police, ki Ophisar ka Jylla bad ki bor treikam ka Sorkar Pdeng lem bad kiwei kiwei.
“Ngi la bthah ia ki ban long kiba peit pyrman bha hynrei ka jinglong jingman ka long kaba isuk isain bad kane ka dei kaba la khmih lynti ban pynthikna haduh ka por ba pynlong ia ka elekshon” ong u Kumar haba iakren bad ki nongthoh khubor.
Ula pyntip ba ka ECI kala shong jingialang ruh ban iatai bniah bad ki Enforcement Agency ba kynthup ia ka Excise, GST, Revenue Intelligence, Income Tax, Enforcement Directorate, Airport Authority, Reserve Bank of India, Narcotics, Railways bad kiwei kiwei.
Kat kum ka jingong jong u, ka jingthmu ba ha lyndet jong kane ka long ba kine kin wan iatreilang ha kaban pynthikna ba ka elekshon kan lait na ki jingpynngop.
“(Kane kan pynthikna) kam don lynti satia ia ki jingsam ia ki jingai sngewbha, ka jingiaid ka pisa na kawei ka jaka sha kawei pat lane ban sam, ia u drok ba un nym iaid kylleng lane ban nym iadih. Ngi la bthah ia baroh bad kin sa pyrrkhing bha ia kane” ula ong.
Ula ong baka Narcotic Bureau kin peit pyrman bha ia ki lynti iaid kiba ju pyndonkam ban wan pynpoi katba ki air intelligence unit kin peit pyrman ia ki liengsuin bad ki helicopter kiba wan sha Jylla bad mih na Jylla.
Haba pynpaw ba ki khappud Inter-State bad International kin dei kiba khmih da ki shipai, u CEC ula ong b aka ECI kan pyndait ia ki CCTV camera ha baroh ki polling station ha kum kine ki jaka.
Ula ong ba ka Commission kala shong bishar bad ka tip ruh ia ka jinglong jingman ha ki jaka khappud bad ka Assam. “Baroh ki Ophisar na ki District jong kine ki Jylla kila don ia ka jingiakren kaba sani bha..(namar kata), kan long kaba suk ba sain bad ym donkam ban iakhuslai ne sheptieng” ong u Kumar.
Kat kum ka Electoral Roll bala pynmih ha ka 5 tarik K’lyngkot 2023, palat 21.61 lak ngut ki nongthep vote la pynrung kyrteng ha Jylla bad ki kynthei ki dei kiba kham bun ban ia ki shynrang. Ki Polling Sation ki don haduh 3482 tylli ha baroh ki 60 tylli ki Constituency.
Ka Commission kala shimkhia ruh dalade ban buh jingkhein ia ka jingdon ki nongthep vote ba don jingduna ha ki dkhot met ha Meghalaya kaba kot sha ka 7478 ngut. Ki don haduh 22,658 ngut ki nongthep vote kiba la kynjoh ia ka 80 snem bad palat bad haduh 290 ngut ki dei kiba la kynjoh ia ka 100 snem.
