Shillong Rymphang 01: Ki shipai BSF kiba pahara ha thaiñ kila iohkem ia 2 ngut ki nongdie kyiad bad kila ioh kurup ruh 356 bilor ka kyiad kaba la thmu ban khaii sha Ri Bangladesh.
Ki BSF kila pyntip ba ha ka 31 tarik u Kyllalyngkot, haba kila ioh ia ki jingtip kiba thikna kila pynlong iaka jingpynap shrip bad kila bat ia kawei ka kali bad la shem ba kala kit smam da ka kyiad bad kumta kila kem noh ia u nongniah bad ia u nongbud jong katei ka kali kibadei ki nong India bad kila kurup noh ia ka kyiad baroh.
Kila iathuh, ba ia katei ka kyiad la thmu ban khaii be-ain sha ri Bangladesh lyngba ka thaiñ khappud kaba don ha West Jaintia Hills District.
Ia kitei kiba la shah kem ryngkat bad ka kyiad kaba la kurup, la leit ban aiti noh sha ka Tnad Custom kaba don ha Dawki naka bynta ban leh ia kaba donkam.
