Shillong, Risaw 28 : Ki Pulit ka Jylla kila ioh ban kurup bun bah u ganja, uba khia haduh 206.054 kilo, na kawei ka kali Maruti Expresso ba don u nombor AS-01-EG-7234 ha ka step sngi Ba-ar.
Ia kane ka kali la pynieng ha ka por talasi kali hynrei u nongniah bad u nongbud, kila phet pynban haba iohi iaki Pulit bad ieh shadien ia ka kali.
Ki Pulit ka Ri-Bhoi kila talasi ia ka kali ha ka jingiadonlang ki Heh Ophisar bad ki nongsakhi shimet bad kila ioh kurup haduh 28 tylli ki song, ia kiba la pynshisha ba dei u ganja.
Ia kane ka kali bad ia une u ganja la kurup noh. Ki Pulit kila register case halor kane ka jingjia.
Kat kum ka jingong u Superintendent of Police ka Ri-Bhoi V Rathore, ka jingtohkit mynta kala iaid shakhmat hynrei ym pat shym la iohkem briew satia haduh mynta.
Ula ong ba ki Pulit ki dang pyrshang ban thwet ia ki briew kiba donkti ban khaii beain ia une u jingdih buaid.
