Shillong, Nailar 13: Ki Pulit ka East Garo Hills kila ioh ban kurup ia bun bah ki tiar ialeh bala buhrieh hapoh kawei ka khlaw hajan Williamnagar kiba kynthup ia ki kuli siat liengsuin iapom (anti aircraft ammunition).
Ia kine ki tiar ialeh la ioh kurup na khlaw Pillonggre kaba hap hapoh ka Williamnagar Police Station hynne ka step phyrngap.
La suba jur ba kine ki tiar ki dei kiba la buh da u Commander-in Chief bala kyllon iap jong ka Garo National Liberation Army (GNLA) u Sohan D Shira, uba la shah siat iap ha ka jingkhynra ki Pulit ha u snem 2018.
Halor ki jingtip ba thikna, ka kynhun ki Pulit kila pynlong ia ka jingkhynra ha Khlaw Pilonggre kaba hap hapoh ka Durama Range. Kane ka jingkhynra kala sdang ha ka por 1.40 mynstep kaba lam sha kane ka jingioh kurup ia kine ki tiar bala suba buhrieh da ka GNLA.
Ki tiar kiba la ioh kurup ki kynthup haduh 79 tylli ki kuli siat liengsuin iapom ba dang treikam, 175 tylli ki kuli 7.7 mm ba dang treikam, 10 tylli ki Electrical Detonators, Uwei u 12 bore Double Barrel bad kumba 250 gram u gelatin stick.
Ia kine ki tiar ba ioh kurup la kit noh sha Williamanagar Police Station bad ka jingtohkit mynta kala iaid shakhmat.
