Nongstoiñ, Nailar 13: Ka West Khasi Hills ka dei ka District kaba heh duh na baroh ki district ha ka jylla bad ka dei ruh ka district kaba ki kam pynroi ki duna haduh katta katta la ka long ha ki surok, ka umbam umdih bad ka bording.
Napdeng ki lai tylli ki Constituency, ki shnong kiba hap hapoh ka Rambrai Jyrngam bad ka Mawshynrut ki dei kiba dang bun ki shnong ki bym pat don surok.
Kine ki shnong ki kynthup ia ka Mawshad, Umshem, Rynñiaw, Domkyrkoh, Umїong, Darephang, Nongspung, Umbah, Nongmawleiñ, Mawkhap, Mawsngi, Umyiap, Miangbyrkong, Mawdiangsnam bad kiwei kiwei.
Ki Nongshongshnong jong kine ki Shnong haduh mynta kim pat iohi kali satia bad kila hap ban iaid kjat haba ki leit sha kino kino ki jaka la sha iew sha hat ne leit sha kino kino ki kam.
Kaba ipangmet eh ka long ha ka por ba don kiba pang ba shitom ha kaba ki briew kila hap ban shu kit da ki kynja khoh da ka met ban pynpoi sha ki jaka sumar.
Hynrei kine ki shnong, ki la їoh pat їa ka bording elektrik na ka skhim RGVVY, kaba dei ka skhim jong ka sorkar pdeng.
Ki shnong kiba hap ha ka Mawshynrut Constiuency ki bym pat don surok ki dei naduh Nongshyrkon, Nonglyer, Phodjalei, Nongkrong, Unshynrut Mawkhar, Nongsleh, bad kiwei kiwei.
Ha kaba їadei bad ka jingbym pat don surok, ki paitbah ka Nongshyrkon, Umshynrut, Nongkrong bad kiwei kiwei, ki la ong ba la slem bah ki la kwah ban їoh surok, hynrei haduh mynta ki dang hap ban їaid kjat da ki bun bun kynta ban poi ha surok kali.
Nalor kata ki la ong ruh ba lada dei ha ka por tlang te kam da jynjar than, namar ki Mahindra pickup ki lait wut wut. Hynrei ha ka por lyiur te wat ki kynthei ruh ki hap ban hiar bad khynñiat lang їa ki kali, hynrei bun kaba sah kut ban їa kaba їaid beit. Ki nongshong shnong ka Phodjalei, ki la ong ba mynta ka la don ka jingkieng lyngba ka wah Rwiang kaba la dep pyntrei.
Hynrei namar ba ym pat plie, kim pat shah ban їaid kali, kumta na ka bynta ban kit їa ki mar ki mata, ki hap ban don kawei ka Mahindra pickup kaba ap sha shilliang ban pynpoi їa ki mar ki mata shapoh shnong, katba kawei pat ka dei kaba mih na Nongstoiñ ban pynpoi їa ki mar ki mata ha katei ka jaka.
Ha kajuh ka por ki la ong ba naduh ba u kontraktor u la dep ban pyntrei їa katei ka jingkieng, ki la don ka jing kyrmen kaba khraw ba ha u snem ban wan ki kali ki la lah ban їaid, namar ym slem shuh ba yn sa plie noh їa katei ka jingkieng.
