Shillong, K’Lyngkot 06: Ki Pulit kila ioh ban kurup bun bah ki tiar siat ba la tep bad buhrieh bha ha kawei ka khlaw siej ha ka shnong Santogre, South West Garo Hills District.
Kane ka jaka ba lap iaki tiar siat ka hap hapoh ka Salmanpara Police Station.
“Ka kynhun pulit ka la lap ia ka jaka buh tiar siat kaba la tep ha kawei ka khlaw ha jan ki siej ha ka por ba ki dang pynlong ka jingkhynra. La lap haduh 55 tylli ki tiar (Anti-Aircraft Ammunition)” ong u Superintendent of Police Vikash Varma.
Ia ki tiar siat la kurup noh ha ka jingdon lang ki nongsakhi hadien bala bud ryntih ia baroh ki kyndon ain.
“Ka jingtohkit kaba kham bniah ka dang ïaid shakhmat ban pynthikna iaka jingwan poi ki tiar siat ha kane ka jaka bad ban lap ïa ki briew kiba donkti ha kane ka kam be-aiñ” u la bynrap.
U SP u la kyrpad ia ki paidbah ba kin wan shakhmat lada ki don kano kano ka jingtip kiba iadei bad ki ba briew ba donkti ha kane ka kam beain.
“Lada don jingtip wan mih lane pyntip shaki Police Station ba jan tam. Yn buhrieh iaki nong ai jingtip bad yn ai ruh ïa ka buskit” u la pynthikna.
