Shillong, Iaiong 25 : Ki Pulit ka South Garo Hills, hynne ka step sngi Palei, kila ioh ban kurup haduh 340 tylli ki kuli siat Liengsuin bad saw tylli ki synduk buh kuli na kawei ka khlaw kaba don hapoh ka District.
Ia kine ki kuli la ioh kurup da ki Pulit ka Chokpot Police Station napoh ka khlaw jong ka shnong Chibokgre, kaba hap hapoh ka Chokpot Police Station, South Garo Hills.
Ki Heh Pulit ki pyntip ba halor ka jingioh ia ki jingtip na ki tyllong ba thikna, kila pynlong ia ka jingkhynra ha ka thain bad kila lap ia kine ki synduk buh kuli bala suba jur, ba buhrieh da ki kynhun kaikhlaw hapoh kane ka khlaw.
Ki iathuh ba ha ka por 1:15 baje mynstep, kawei ka kynhun Pulit ba ialam da u SDPO Chokpot bad ba synran da u CI Sadar, OC Chokpot, I/C BDDS bad lai ngut ki Pulit, kila leit sha kane ka jaka ban wad ia kine ki kuli ba buhrieh.
Ki iathuh ba dei ha ka por 3:27 baje ba kila lap ia kine ki kuli siat liengsuin bad ki synjuk ha kane ka khlaw.
