Shillong Kyllalyngkot 22: Ki shipai BSF kila iai bteng ban tehlakam ia ki kam khaii ha ki thain khappud bad dang ha ka 20 tarik mynta u bnai kila ioh ban kurup ia ki jain kiba shongdor T.24 Lak na ka thain khapppud kaba hap ha East Khasi Hills.
Kitei ki jain kiba la ioh kurup kidei kiba thmu ban khaii be-ain sha ri Bangladesh khamtam haba ka jur bha ka jingdawa ia ki jain kiba na ri India.
Ia kitei ki jain la ioh kurup da ka 4th Bn BSF na ka shnong rim Pyrdiwah hadien ba kila beh thong ia ki ar tylli ki kali kiba kit ia kitei ki jain.
Ki BSF kila iathuh ba kila pynsangeh ia kitei ki kali hynrei ki nongniah jong kitei ki kali kila pynher sted pynban sha ka thain Pyrdiwah kaba don marjan bad ka ri Bangladesh bad ha kane ka jingjia ki nongniah jong kitei ki kali kila phet krad noh na katei ka jaka bad ka ieh noh tang ia kitei ki jain kiba la song bha.
Ia kitei ki jain kiba la kurup la aiti noh sha ka tnad Custom bad la ujor ruh iaka ejahar ha Pynursla Police Station na ka bynta ban pynlong iaka jingtohkit bad ban leh ia kaba donkam.
