Shillong Nohprah 03: Ki shipai BSF ha ka sngi Saitjain kila ioh kem ia arngut bad kurup ia ka shini najan ka jingkieng Hingaria, East Jaintia Hills, kaba thmu ban khaïï be-aiñ shapoh ri Bangladesh.
Ki BSF kila pyntip, ba kila pynap shrip halor ka jingioh khubor ban don ki kam khaii tuh bad ha kane ka jingpynap shrip kila lap ia ar tylli ki kali Blero Pick Up kiba don ia u nombar ML-04D-2343 bad ML-04D-6828 bad ha ka por ba kila leit shajan kitei ki kali, ki nongniah jong ka kali kila phet krad bad ki BSF kila beh thong haduh da iohkem ia ki.
Ha ka jingtohkit kine ki arngut kila phla ba kila kit iaka shini ban ioh khaïï sha Bangladesh bad haba kila khmih bniah ia ki kali, kila lap ia ka shini kaba la don bun bha.
Ki BSF kila iathuh ba kitei ki ar tylli ki kali kidei kiba la longtrai da ka Queendun Suting bad Ibannangroi Suting kiba na ka shnong Nongbareh Lyntiara.
Ha kajuh ka por, ki BSF kila pynlong ia kawei pat ka jingkhynra bad ioh kurup ia ki mar ki mata kiba shongdor T.2 Lak kiba la thmu ban khaïï be-aiñ sha ri Bangladesh.
Ia kitei kiba la shah kem ryngkat bad ki kali bad ki mar kiba la ioh kurup la aiti noh sha ki bor kiba dei khmih ba kin leh ia kaba donkam.
