Dibrugarh, Nohprah 03: U Myntri ka Sorkar Pdeng ba khmih ia ka Ports, Shipping bad Waterways bad Ayush, Sarbananda Sonowal ula ong ba ka jingai rai jong ki paidbah sha ka BJP ka dei ka jingai sakhi ia ka ‘Modi Ki Guarantee” hadien ka jingjop ia ki Assembly Election ha Rajasthan, Chhatisgarh bad Madhya Pradesh.
Une u Nongialam ka BJP ula ai khublei ia u Myntri Rangbah Duh Narendra Modi ula ialam nakhmat ban ioh ia kane ka jingjop ba sah khana ha kine ki lai tylli ki Jylla.
Haba kren ha kane ka sngi, u Sonowal ula ong “Mynta ka dei ka sngi sah khana ia ki paidbah jong kane ka Ri namar kala ieng biang ka riti synshar paidbah kumba la pyni da ki paidbah ka Ri. Da ka jingjop ba sngewhun ha Rajasthan, Madhya Pradesh bad Chhatisgarh, ki paidbah ka ri India kila pynsngew ia ka rai jong ki ban kyrshan ia ka Vikas-Modi ki Guarantee.
“Ka Modi Ki Guarantee ka dei kaba shisha bad kaba la ai jingmyntoi bha ia ki paidbah ka ri jong ngi. Naduh u snem 2014, u Narendra Modi ula ai jaka ia ki jingkylla ha ka imlang sahlang bad ka ioh ka kot sha baroh ki nongshongshnong ka Ri India ba kin im ka jingim ba don burom. Ki paidbah kila iatreilang ha kane ka jingkylla bala wanrah da u Modi da kaba ai ka jingshaniah ban ialam shakhmat ia ka India ha kaban pynurlong ia ka thong jong ka Atmanirbhar Bharat” ong u Sonowal.
