Shillong, Nohprah 01 : U Symbud Myntri Rangbah ka Jylla Bah Prestone Tynsong hynne ka sngi palei ula kular ia ki nongialam ka Meghalaya SSA School Education (MSSASA) ba ka Sorkar kala dep thung ia ka Search Committee na ka bynta ka State Education Commission ka ban iarap ha ka ban pynbeit ia ki jingeh jong ki nonghikai SSA ha ka Jylla.
Kane ka Search Committee ka dei kaba khlieh da u Chief Secretary ka Jylla ha kaba un sa ai jingmut ia ki kyrteng ban thung kum u/ka Chairperson bad ki Dkhot jong ka State Education Policy.
U President ka MSSASA Bah Aristotle Rymbai haba iakren bad ki nongthoh khubor, ula iaroh ia ka Sorkar MDA ba ialam da u Conrad K Sangma namar ka jingshim ia kane ka rai.
U Bah Aristotle ula pyntip ba ha kane ka jingiakynduh, u Symbud Myntri Rangbah ula ong ba ha ka 9 tarik Naiwieng, ka Kynhun Myntri kala tyrwa ban thaw ia ka State Education Commission bad halor kane, ka Sorkar kala thung ia ka Search Committee ka ban khlieh da u Chief Secretary.
“Ka Search Committee ka ban khlieh da u Chief Secretary kan hap shim jingkitkhlieh ban ai jingmut ia u/ka Chairperson bad ki Dkhot ka State Education Policy ka ban pynbeit ia ki jingeh jong ki Nonghikai SSA ha ka Jylla” ong u Bah Aristotle.
U Bah Aristotle ula ong ba ka Sorkar Jylla lyngba ka State Education Commission, kala kular ban shimkhia ia ki jingdawa jong ngi kata ban pynkiew ia ka tulop bad ban rah lut ia baroh 12541 ngut ki Nonghikai SSA n aka State Implementation Society sha ka State Education Department.
“Namar kata, ngi la wan ban ai khublei ia ka Sorkar MDA halor kane ka sienjam bala shim hapoh ka jingialam jong u Myntri Rangbah Conrad K Sangma namar ka Kynhun Myntri kala ai jingmynjur ban thaw ia ka State Education Commission” ula bynrap.
U Bah Aristotle ula ong ba ha kane ka jingialang, kila iakren ruh halor ka jingpyllait noh ia ka tulop ba arbnai ba sahteng, kaba dei jong u bnai Risaw bad Naiwieng shuwa ka Khristmas.
Ula bynrap ba u Symbud Myntri Rangbah ha ka jingiadonlang u Secretary ka Education Ambrose Marak, ula ai ka jingkular ban pyllait noh ia ka tulop ba arbnai shuwa ka Khristmas mynta u snem.
