Shillong, Nailur 15 : U Symbud Myntri Rangbah ba khmih ia ka Tnad Bording Bah Prestone Tynsong hynne ka sngi palei, ula kular ba ka Sorkar kan sa shim ia ki sienjam ha kaban pyntreikam ia ka jingdawa jong ki nongtrei Casual ka MeECL ban thungkam pura kat kum ka lynti ka ain.
“Ka kam ba iadei bad ka jingdawa thungka pura ia 1802 ngut ki nongtrei casual ka dei kaba sngewkhia bha jong ka Corporation (MeECL) bad kane ka jingdawa kam shym la poi sha ki skhor ba kyllut” ong u Bah Prestone haba jubab ia ka Zero Hour Notice bala wanrah da u Chief Whip ka Liang Pyrshah Bah George B Lyngdoh ha Iingdorbar.
Hynrei u ong “ Shuwa ban pyntreikam ia ki jingdawa, ngi hap ban bishar pat ia ki jingktah kiba lah ban mih na ka ain bad ruh ka pla tyngka”.
Ka MeECL Progressive Workers Union (MePWU)kala dawa ban thungkam pura noh ia ki nongtrei casual/contract bad ban siew ia ki arrear ba dang sah jong u bnai Risaw 2018 haduh u Rymphang 2019.
U Bah Prestone ula ong ba ka jingsiew ia ki arrear ka dei kaba la mynjur kat kum ka jingidonkam.
Haba pyntip ba ka MeSEB kala thungkam casual ia ki briew nabar kat kum ka jingdonkam. La thung ia ki na ka bynta 60 sngi bad shisngi ka shuti bad ka jingpynthymmai ia ka jingai kam casual ka dei kaba la leh na ka por sha ka por.
Da ka jingpynkylla corporation jong ka MeECL naduh ka 1 tarik Iaiong 2010, ka tnad kala iai pyndonkam ia kine ki nongtrei casual bad la siew da ka bainong sngi kat kum ka Minimum Wages Act bala pyntreikam da ka Sorkar Meghalaya bad ka Corporation.
Ia mynta ki don haduh 1802 ngut ki nongtrei casual bala thungkam da ka MeECL ha ki lai tylli ki shnat treikam jong ka.
U Bah Prestone u ong ba da ka jingthmu ban pynbeit ryntih ia ka rukom thung ia ki nongtrei casual hapoh ka Corporation bad ruh haba buh hakhmat ia ka bha ka miat ki nongtrei, ka MeECL kala wanrah da ka jingiateh contract ba im shisnem bad kaba dei ban pynthymmai manla u bnai ha ryngkat ki jingmyntoi ba kynthup ia ka provident fund, subsidy jong ka MHIS, Casual Leave, Earned Leave, Maternity Leave bad Payment of Overtime.
U ong ba ka jingtywa ruh ka long ban pynheh noh ia ka tulop ha kaba la buh ia ka percentage ban pynheh ia ka jingsiew jong ki nongtrei bala shakri palat 5 snem hynrei hapoh 10 snem kan long 5% n aka jingsiew bainong ba shibnai bad ia kito kiba la shakri palat 10 snem hynrei hapoh 15 snem, la buh ban pynkiew 10% n aka bainong ba ki ioh shibnai.
