Shillong, Risaw 21 : U Symbud Myntri Rangbah ka Jylla Bah Prestone Tynsong hynne ka sngi thohdieng, ula kular ba ka Sorkar Jylla kan pyrshang ha kaban pyllait noh ia ka tulop jong ki Nonghikai SSA hashuwa jong ka Khristmas.
Ia kane la pyntip da u President ka Meghalaya SSA Schools’ Association (MSSASA) Aristotle C Rymbai hadien ka jingialang bad u Bah Prestong.
“Ngi la iakren ruh ia ka jingpyllait noh ia ka tulop ki Nonghikai SSA jong u bnai Nailar, Risaw bad Naiwieng shuwa ka Khristmas. U (Prestone)la kular ia ka Association ban sa iakren bad ka Tnad ba dei khmih bad ba ka Sorkar kan pyrshang kat kaba lah ban pyllait noh ia ka tulop shuwa ka Khristmas” ong u Bah Aristotle.
Ula ong ba ka jingialang hynne ka sngi ka dei kaba lai hadien ka jingialang kaba la long ha ka 21 tarii u Naitung, kaba la pyniaid da u Symbud Myntri Rangbah ha ka jingiadonlang ki Ophisar na ka Tnad Pule Puthi,
U Bah Aristotle ula ong ba ka jingialang kala iakren sani bha halor ki jingdawa jong ki nonghikai SSA ba kynthup ia ka jing pyntreikam ia ka jingsiew tulop ba shisien ha ka lai bnai ia ki nonghikai SSA, ban thaw ia ka State Education Commission ka ban peit ia ka jingeh jong ki Nonghikai SSA.
“Halor kane, u Symbud Myntri Rangbah ula pyntip ba ka Tnad kala dep leh ia kaba donkam bad mynta kaba sah ka long satang ban ioh ia ka jingmynjur jong ka Kynhun Myntri kaba lah ban shong jingialang ha ka taiew ba nyngkong jong u bnai Naiwieng” ula bynrap.
