Shillong, Nailur 04: Ka Myntri ka Koit ka Khiah ka Kong Ampareen Lyngdoh hynne ka sngi Nyngkong kala pynthikna ba ka sorkar jylla kan pynbeit biang iaka jingbhah pule MBBS lada shem ba ki kot ki sla jong ki nongapplai ki long kiba thok bad ki bym shisha.
“Ngi la pynthikna ba baroh kiba applai ban ioh iaka bhah pule kidei ban soi iaka jingiatehkular bad lada lap ia kino kino ki kot ki sla kiba shu thok bad ki bym shisha yn pynduh noh iaka bhah pule ka jongki” ong ka Kong Ampareen Lyngdoh hadien ka jingiakynduh iaka kynhun jong ka seng Khasi Students’ Union (KSU), kaba la dawa ba kadei ban tuklar ha kaba iadei bad ka jingai ia ki kot ki sla ki bym shisha da ki nongapplai ban ioh pule iaka MBBS lyngba ka bhah jong ka sorkar jylla.
Kala pyntip ba ka tnad ka koit ka khiah kala dep phah da ka jingthoh sha ki Deputy Commissioner (DC) ban pynshisha ia ki kot ki sla kiba la aiti da ki nongpplai bad halor ka jubab kaba la ioh na ki DC kumta ka tnad kala pynbna iaka thup banyngkong kiban ioh pule iaka MBBS dang shen.
Ka Kong Ampareen kala ong ba ka kynhun jong ka KSU kala pynpaw ba kam hun iaka rukom bishar bniah ia ki kot ki sla da ki bor pyniaid District.
“Haba kum kine ki jingkynnoh ki mih, kumta ka long kaba dei iaka tnad ka koit ka khiah ban phah biang sa shsien ban pynshisha ia ki kot ki sla. Ngi la kyrpad iaka KSU ba kan aiti da ka jingthoh namar ka long kaba kongsan bha namar ngin ym don ia kano kano ka nongrim ban phah khmih bniah biang sa shisien ia kaei kaba la dep ban khmih bniah” la ong ka Myntri.
Kala pyntip ba ka sorkar pdeng hynin ka miet, kala bhah sa ar tylli ki Seat ia ka jylla Meghalaya.
“Ngin sa pynbeit biang iaka thup kyrteng jong ki kyrtong ban pynthikna ba ia kitei ki ar tylli ki seat ruh dei ban pyllait paidbah khnang ba kan don ka jingkhmih bniah da baroh kiba don ia ka jingsngewkhia” ong ka Kong Ampareen.
Kala ong ba ka sorkar kan ym lah ban pynslem ha ka jingbhah ia ka Seat namar ba bun ki jaka pule kila buh ia ka por ka jongki na ka bynta kito kiba la ioh iaka bhah pule ba kidei ban pyntip noh mardor sha kitei ki jaka pule ha ka 1,2 bad 3 tarik u Nailur.
“Ngi lah duna ka por, kumta ngin ym lah ban pynslem iaka thup kyrteng namar kan ym long kaba iahap ban bat sah ia ka thup kyrteng hynrei haba don kano kano ka jingujor lyngba ka jingthoh pyrshah ia kino kino ki nongapplai, ngin ailad ia ki ba kin iaid shakhmat ban kam iaka seat bad ban sdang shim ia ka Admission hynrei hadien ka jingkhmih bniah bad lap ia kino kino ki jingduna. Ngi la dep ban phah soi iaka soskular ha kaba ki hap ban soi bad ngi lah ban pynduh noh iaka Seat jongki ha kano kano ka por” kala ong.
Katba na ka liang u General Secretary ka KSU u Samla Donald V Thabah haba iakren bad ki nongthoh khubor ula ong, ba ka seng kala lap ba ki don katto katne ngut ki briew ki bym don ia ki kot ki sla kiba biang kiba la shah kynthup haka thup kyrteng kaba la pyllait da ka tnad ka koit ka khiah dang shen.
“Kawei na ki kyndon ban applai ban ioh pule lyngba ka bhah sorkar iaka MBBS, kadei ba ki nongapplai kidei ban dei ki nongshong shnong ba pura jong ka jylla ban don iaka Permanent Resident Certificate (PRC) hynrei 9 ngut ki samla pule lyngba ka Open Category kim shym la aiti iaka PRC hynrei kila aiti tang iaka Provisional PRC (PPRC) kaba treikam tang 3 bnai ne 12 bnai. Hynrei namar ka kyndon kadei ban ai iaka PRC, kumta ban aiti da ka PPRC kam long kaba lah ban pdiang ban ioh pule MBBS lyngba ka bhah sorkar” ong u samla Donald bad ka iathuh baka Myntri Sorkar kala pynthikna ia ka seng ba kan bat shwa ia ka thup kyrteng.
Ula ong ba ka KSU kala rai ban phah da ka jingujor khnang ban ioh pynlong ia ka jingtohkit kaba bniah halor katei ka kam.
U Nongialam ka KSU, ula pyntip ruh ba ka Myntri Sorkar kala pynthikna ba arngut ki samla Khasi kiba la wan ha ka kyrdan kaba nyngkong bad baar ha ka Khasi-Jaintia category, yn sa pynrung noh haka open category bad ha ka jaka jongki yn sa pynrung noh da arngut ki samla Khasi kiba don ha ka Waiting List yn sa ka kynthup noh haka thup kyrteng.
Ka Kong Ampareen kala iathuh ruh ba kala iakynduh iaka kynhun jongka Voice of the People Party (VPP) ha kaba iadei bad katei ka juh hi ka mat bad baroh kiba la wan iakynduh ia ka kila pynpaw ia ka jingsngewkhia ba dei ban pynthikna ba ka rukom bhah kadei ban long ha ka lynti kaba dei.
