Shillong, Nailur 04 : Ka Khasi Students Union (KSU)-Mawlai Circle kala dawa ia ka Tnad Pulit ba ka dei ban pynshitom mardor ia uwei u Pulit uba kawang bom tdem ba pynsat khmat sha kawei ka dukan sha ha parking lot pyrshah ka SBI main Branch, ha ka por ba mih ka jingkulmar hapdeng kawei ka Sengbhalang bad ki Pulit ha ka thain Kachari – Khyndailad hynne ka sngi Nyngkong.
U President ka KSU-Mawlai Circle samla Biangbor Paliar, ula kynnoh ba kane ka jingleh jong une u Pulit ka dei ka jingpynibtr bad ka jingleh palat khlem da khein snep shuh ia ki Kynthei briew kiba die dukan ha kane ka jaka pynieng kali jong ka MUDA.
Kat kum ka jingong jong u, arngut ki Kynthei briew kiba dei na Mawlai Mawtawar bad Umjalimut kila shong dukan sha ha kane ka jaka bad mar syn mih ka huri hura, kine ki kynthei kila khang khyrdep ia ki dukan jong ki.
Hynrei la kynnoh, uwei u Pulit phong jain iong ula leit kawang khnang da u bom tdem ba pynsat khmat sha kane ka dukan (kumba paw ha ki video bala saphriang) khlem da khein ne don ka mynsiem isynrei ia kine ki kynthei.
U samla Biangbor ula ong “Kane ka (jingleh u Pulit) dei ka jingthmu ban pynmynsaw ia kine ki 2 ngut ki Kynthei briew bad ka dei tang ka jingleh kput lane leh rhah bad ka dei ruh ka jingthmu ban shim ia ka jingim jong kine ki kynthei briew ki bym don bynta eiei ruh em ha ka jingkulmar ba mih ha ka thain”.
Ka KSU ka pynrem jur ia kane ka jingleh une u Pulit haba dawa ba dei ban pynshitom mardor ia ki Pulit ba donkti ha katei ka jingthombor.
“Ka seng ka i kyndit ruh iaka jingleh khlaiñ bor ki pulit iala ki doh ki snam hapoh sor Shillong hynrei katba ki pynrit bad pyndem tdong pat ha ki thaiñ khappud” ula kynthoh.
