Shillong Nailur 04: U Symbud Myntri Rangbah ka jylla u Bah Prestone Tynsong uba khmih ia ka tnad Kam Pohiing, hynne ka Lah Sngi u Blei ula pynpaw ba u pdiang iaka jingthmu jong ka sorkar pdeng ban pyntreikam iaka ‘one nation, one election’ ne ‘Kawei ka Ri, Kawei ka Elekshon’.
U Bah Prestone Tynsong haba iakren bad ki nongthoh khubor, ula ong ba ka katei ka mat kam pat shym la wan ban iatai sani la ka dei hapoh Parliament ne hapoh ki iingdorbar thawaiñ ka jylla bad kumta um pat kwah ban kren eiei.
“Hynrei katkum ka jingsngew ka jong nga shimet hi, lada ngi don kawei ka ri bad kawei ka elekshon, nga tharai ngin lah ban tyngkai iaka por, ngin lah ruh ban tyngkai bha ia ka pisa bad ngin lah ruh ban tyngka ia ka jingpyndonkam ia ki briew, ia kaba ngi hap ban pyndonkam shisien ba don ka elekshon. Ngi hap ban sngewthuh shisien ba hap ban pyntreikam mardor ia ka Model Code of Conduct, man la ka 6 ne 7 bnai bad kane ka ktah bha ia kiwei pat ki kam pynroi jongka sorkar jylla ne sorkar pdeng” ong u Bah Prestone.
