Shillong, Naitung 11 : Ka Khasi Hills Autonomous District Council (KHADC) kala kular ban thaw da ka Committee ba kyrpang ban leit iakren halor ka kam ba iadei bad ka jingbym kynthup ia ka ain Bharatiya Nagarik Suraksha Sanhita (BNSS) hapoh ka Sixth Schedule jong ka Riti Synshar ka Ri.
Haba jubab ia ka motion bala wanrah da u MDC ba shusieh Bah Bindi M Lanong hapoh ka Dorbar Lyiur hynne ka sngi Palei, u DyCEM Bah Pynshngain N Syiem ula ong “Ngi donkam ban thaw ia ka Special Committee. Ngin sa leit iakren ia kane ka kam bad ka EC kan sa shim rai shen ia ka kam. Ka Special Committee halor ka jingpynkylla ia ka Sixth Schedule kan don ia ki dkhot kynthup ki stad ki jhad ki ban iakren ia kane ka mat ba kongsan”.
Ula kynnoh ba ka Sorkar Jylla ka khlem iasyllok bad ki Autonomous District Council (ADC) hashuwa ba kan pynmih ia ka jingpynbna ha kaban pyntreikam ia ka BNSS hapoh ka Jylla.
“(Kat kum ka Ain), ka kyndon jong ka BNSS kan ym treikam satia ha ki jaka riewlum laitnoh ki lai tylli ki lynnong (chapter). Hynrei ka don ka jingong ba kino kino ki Sorkar Jylla ki lah ban pynbna lyngba u Lat ha kaban pynlong ia ka BNSS kaba treikam ha ki jaka riewlum. Ka Sorkar Jylla ka khlem iasyllok ia ngi bad kila jam shakhmat ban pymih ia ka jingpynbna ha ka 26 tarik Jylliew. Kane ka long kaba sngewsih” ong u Bah Pynshngain.
‘Ha ka jingshisha, ka ain kala kren shai bha ba ka Sorkar Jylla ka lah ban pyntreikam ia ka BNSS lyngba ka jingpynbna hynrei ki khlem iasyllok satia ia ki ADC. Ha ka jaka ban ong ba u Lat u sngewbha ban pynlong ia ka BNSS kaba treikam ha ki jaka riewlum, kila ong ba ia kane ka ain yn pyntreikam ha baroh ki Iingkasahri. Kumta, nga iohi ia shibun ki kynrum kynram” ula ong.
“Kat kum ka jingpynbna bala pynmih da ka Sorkar Jylla, la iohi bay m dei tang lai tylli ki lynnong (chapter) hynrei baroh ki kyndon ka BNSS kin treikam hapoh ka Jylla. Lada la pynduh noh ia ka CrPC bad ka BNSS kam shym la kynthup ha ka para 4 bad 5 jong ka Sixth Schedule, kumta ka long kaba donkam ban pynkylla ia ka Sixth Schedule khnang ba ka BNSS kan don lang ha ka para 4 bad 5” ula bynrap.
U DyCEM ula kular ba ka KHADC kan sa shimkhia ban iakren ia kane ka kam khnang ban pynthikna ba kan ym don ka jingpyntroin ia ka bor treikam jong ki Iingkashari shnong, ki Iingkashari Hima bad ki Iingkashari District Council.
 kala kular ban thaw da ka Committee ba kyrpang ban leit iakren halor ka kam ba iadei bad ka jingbym kynthup ia ka ain Bharatiya Nagarik Suraksha Sanhita (BNSS) hapoh ka Sixth Schedule jong ka Riti Synshar ka Ri.){kind=link}