Kular ka DGP ban leh eiei halor ki nongpynkulmar shnong bad ki jingeh ki PWD

Shillong, Jymmang 30: Ka Director General of Police (DGP) ka Meghalaya ka Kong Idashisha Nongrang hynne ka sngi kala lum ka jingialang ba nyngkong eh bad ki paidbah ban iakren halor ki jingeh jong ki paidbah bad ki mat kiba ktah iaka Jylla.

Haba kren sha ki lad pathai khubor hadien ka jingkynduh ia 22 tylli ki kynhun bad ki riew paidbah, ka Kong Nongrang kala ong “Ka long kaei kaei kaba sngewtynnad ban ioh kynduh iaki paidbah na kylleng ka Jylla. Ki don kiba wan pynsngew iala ki jingujor, ki don kiba wan pan jingiarap, ki don ar kynhun kiba wan iakren halor ki Pulit kiba khlad haka por trei bad kila dawa ban ai kam bad ngi la buh jingthoh ia kine baroh.

“Ki don kiba la wan tang ban ai khublei. Nga la iakren bad ki. Ki don ki mat jingeh ba ki paidbah ki pynsngew ha nga kim hap haka jingkhmih jong nga hynrei namar ba kila wan, nga la ai jingmut iaki ban leit shaki bor ba khmih” kala ong.

Ka DGP kala iathuh ba ki don ar kynhun kiba la wan ban pynsngew iaka jingeh ki briew ba duna dkhot met (people with disabilities) bad kila kyntu ban ai jinghikai pyntbit iaki Traffic Police khnang ba kin nang ban iadei bad ki briew ba duna dkhot met.

Halor kane ka DGP kala kular ban leh eiei mardor.

Ka Kong Nongrang kala kular ban leh eiei halor ka jingdon ki nongthaw jingkulmar ha kylleng ki jaka ka Nongbah Shillong.

Haba kylli, ka DGP kala iathuh ba ka don ka kynhun Taxi Aggregators kaba la pynpaw iaka jingeh hynrei kane kam hap haka jingkhmih ka tnat.

“Ki don kiba la phone namar ba ki kwah kynduh ha kiwei ki sngi bad nga la ong ki lah ban kynduh hynrei ki hap ban shim jingbit hynrei mynta ka sngi, ki lah ban shu wan beit” kala ong.