Tura, Nailar 29 : Ka Non-Gazetted Employees Association ka Garo Hills Autonomous District Council (GHADC) kala byrngem ban sangeh treikam noh naduh ka 15 tarik Nailur lada ka Council kam lah ban siew noh ia ka tulop jong baroh ki Nongtrei kaba la pynsahteng mynta la 30 bnai.
Kane ka jingpynbna kala mih hadien ka jingialang hapdeng ki nongialam ka Association bad u Chief Executive Member (CEM) Albinush Marak hapoh ka Council hynne ka sngi Ba-ar.
Lada kane ka jingsangeh treikam kan urlong, kan dei ka sien kaba ar hapoh ka san snem ba ka GHADC kan sangeh ha ka jingai jingshakri. Kane kan ktah jur ruh ia ka jingiohlum khajna khamtam ba ka khajna bai khew ha baroh ki 5 tylli ki District ka Ri-lum Garo la lum da ka Council.
U CEM ula kular ban pyllait noh ia ka tulop shuwa ban kut u Nailur hynrei ki Nongtrei kim shaniah satia ia kane ka jingkular namar ki jingkular kiba bun ki bym shym la treikam satia.
Ki Nongtrei ka GHADC kiba don sa ki spah ngut, kim shym la ioh tulop mynta la 30 bnai.
Ka sien ba khatduh ba ki ioh ia ka tulop ka dei tang arbnai mynta u snem. Sa 30 bnai ka tulop kim pat shym la ioh satia.
“Ka tulop ba sahteng jong ngi, kala kot ia ka 30 bnai. Kumno ngin im ha kane ka pyrthei khlem ka tulop?. Ngi ruh ngi donkam ban bsa iala ka iing ka sem bad ki Khun jong ngi kim shym la lah ban siew ia ki baiskul bad bun ruh kila shah byrngem beh skul noh” ong u Brithen M Sangma.
Ka jingkiew dor ki mar ki mata kynthup naduh u khaw, ki jhur, ki umphniang shet jingshet wat haduh ka tyndong shet jingshet, kala ktah jur bha ia ki Longiing jong kine ki Nongtrei ka GHADC kiba la iohbam mynta tang da ka jingshim kylliang bad shimram na ki paralok bad ki bahaiing sem ban pyniaid iala ka iing ka sem bad ban buh ia ka bam halor ka miej na ka bynta ki khun ki kti.
Kaba nang pynsyllang shuh shuh ia ki Nongtrei ka GHADC ka long ba haduh mynta kim pat ioh satia ia ka jingsiew kat kum ka 5th pay Commission kaba kila dawa la slem bah. Haduh mynta ki dang ioh ia ka tulop jong ka 4th pay Commission.
“Haduh mynta ngi dang ioh da ka 4th pay commission katba kiwei ki nongtrei jong ka Sorkar Jylla bad Sorkar Pdeng kila ioh da ka 5th pay bad 7th pay commission. Da ka jingpynheh ia ka pay commission, ka dork a mur ruh kala nang kiew hynrei ngi pat hangne tang ka tulop ruh ngim ioh hok” kren bynniaw u Brithen Sangma.
Pule lang ia kane: Lum ka ECI ia ka jingialang ban pynkhreh ia ka elekshon shiteng samoi ha Tripura
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
