Nongstoiñ, Nailar 26: Ka KSU Sengkmie hynne ka sngi thohdieng, kala kner ia ka jingiarap sha ka skul FGEM kaba don ha Nongspung, West Khasi Hills ban iadon bynta lang ha kaban kyntiew ia ka pule puthi hapoh ka dong ka thain.
Ia kane ka song jingiarap la aiti da u samla Rapborlang Nongrum, Asst Finance Secretary ka KSU sengkmie ha ka jingiadon lang kiwei ki Nongialam ka Sengkmie bad na West Khasi Hills, ki bor pyniaid ka skul, ki Nonghikai bad ki Khynnah skul.
Ia ka jingialang la pyniaid da u samla Rapborlang Nongrum uba la shim ïa ka bynta kum u shongknor bad la ïoh ban ai jingkren lyngkot na u samla Johnfisher Nongsïang, u Principal bad kiwei.
U samla Manly Nongpluh haba ai jingkren u la pyni ïa shibun ki jingeh ha kaba ïadei bad ka pule puthi bad ka jingeh kaba kum ka Jaitbynriew ka iakynduh na ka jingduna jong ki samla kiba pass ia ka eksam IAS, IPS bad kiwei kiwei.
“Kumba jia mynta, ka Jylla ka shu shim wai na kiwei pat ki jylla ban bat ia kine ki kyrdan ha ka Sorkar jylla, dei na kata ka daw ba kine ki bar jylla ki ïoh lad ban takraiñ ïa ka Jaitbynriew katba mon” ula ong.
Une u Nongialam ka KSU u la ai mynsiem ïa ki khynnah skul, ki nonghikai bad khamtam ïa u Principal, u ba trei shitom naduh ba sdang haduh ba u soh ka jingtrei shitom ka la phalang ha baroh kawei ka Jylla.
U la kitbok kit rwiang ba kane ka skul kan nang heh nang san na ka snem sha ka snem, lyngba ka jingtrei shitom ki khynnah skul bad ki Nonghikai, khnang ba kane ka dong ka thaiñ kan phalang ha ka jingnang jingstad.
