Nongpoh, K’lyngkot 20 : Ka Joint Action Committee (JAC) ki Sengbhalang ka Ri-Bhoi District, kila pynpaw ia ka jingkmen ba ki bor pyniaid District kila shimkhia ha kaban bthah ia ka NHAI ba kan maramot noh mar mar ia ka jingkieng bala shong synjor ha Dwar Ksuid, ban nym buh ia ki nongleit nongwan ha ka jingma.
Ka JAC ba kynthup ia ka HYC, MPUF, CORP, MPSO bad kiwei kiwei, kila ioh jingtip ia kane ka jingshimkhia jong ki bor District ha ka jingiakynduh ia u Additional Deputy Commissioner ka District Bah MB Tongper hynne ka sngi thohdieng.
Shuwa kane, kine ki kynhun Sengbhalang kila leit ban iakynduh ia une u Heh Ophisar ka District hadien ka jingleit jurip ia ka jingkieng Dwarksuid kaba iaid ka surok Shillong By-Pass, namar ka jingorpait bad ka jingshong synjor mynta la katto katne snem.
Kine ki Sengbhalang kila aiti ruh da ka dorkhas ba dawa ban phah maramot noh mar mar ia kane ka jingkieng hashuwa ba kan mih kano kano ka jingjia kaba sngewsih pyrshah ia ki paid nongleit nongwan.
Haba kren bad ki Nongthoh Khubor, ki nongïalam ka JAC ba kynthup ïa u Bah Aibor Jyrwa bad u Bah Jackson Sohtun, ki la pynpaw, ba ki la shim ïa kane ka sienjam ban leit wad jingtip lyngba ka ophis u DC ki la shimkhia ne em halor ki jingma kiba lah ban mih na ka jingkieng Dwarksuid kaba la nang synjor na kawei ka sngi sha kawei pat hadien ka jingnang mih ki dak orpait ha ki païa jong katei ka jingkieng bad kaba lah ban buh jingma ruh ïa ka leit ka wan jong ki paidbah.
Ki la ïathuh ba u Additional Deputy Commissioner, ula pyntip ba ki bor pynïaid district ki la dep ban leit jurip bad ruh ban bthah ïa ka National Highway Authority of India ban shimkhia marmar ha ka ban maramot ïa kane ka jingkieng.
