Dimapur, K’lyngkot 20 : Ka party Janata Dal-United (JD-U) ba la ialam da u Nitish Kumar ka la shim ia ka rai ban mih na la iing ban ia aireng ha ka ilekshon assembly ha Nagaland ka ban long ha kaba kut taiew jong u bnai Rymphang u ban wan.
Hadien ka jingjop jong ka party ha ki ilekshon hapoh Bihar, ka JDU ka la shim ia ka rai ban pynieng kyrtong ha kiwei pat ki ilekshon jong ki jylla.Haba kren sha ki lad pathai khubor, u Afaque Ahmed Khan uba dei u national general secretary ka party uba khmih ia ka thain shatei lammihngi (Northeast) u la ong; “Hadien ka parliamentary board meeting, ngi la shim ia ka rai katno tylli ki seat ngin iakhun ha kane ka ilekshon assmbly hapoh Nagaland.”
“Ngi la iakhun na ki 14 tylli ki seat ha u 2018.Mynta ka kynti ngi la shim ia ka rai ban pynieng kyrtong kham bun.Ki paidbah ki la phaikhmat sha ngi ka ban mih pli ha ka jaka jong ka BJP hapoh ka thain Northeast.Ka party jong ngi ka la don ha katei ka thain bad kala trei ban pynkhlain ia ka ktem,” ong u heh ka JD-U.
Nalor kata u la ong ruh; “Ngi la pyrkhat na ka bynta ka jingiateh lok bad ki katto katne ki party kiba ia sngewthuh jingmut.Ka party ka la pynieng kyrtong ha kane ka jylla naduh ka snem 2003 hadien ba kala pynieng 13 ngut ki kyrtong ha ka dorbar kaba don 60 tylli ki seat bad jop na ki lai jaka.
Ha kawei pat ka bynta, ka JDU ka kyrmen halor ka jingjop hapoh Nagaland khnang ba kan lah ban pynurlong ia ka jingangnud ba la slem jong ka ban shah kynthup ha ka thup jong ki national party.
“Ngi la don lypa ha ka thup jong ki state party ha ki laitylli ki jylla, kata hapoh Bihar, Manipur bad Arunachal Pradesh. Lada ngi lah ban treikam bha kane kan nangkyntiew shuh shuh ia ka lad ka kabu,” ong u Khan.
