Shillong, Rymphang 16: U Lat ka Jylla Phagu Chauhan ha ka sngi Thohdieng ula ong ba ka Sorkar sa shisien ka ban biang ba ka long kaba kloi ban iakren bad ka kynhun kiengatiar Hynniewtrep National Liberation Council (HNLC) hapoh ki kyndon jong ka Riti Synshar ka Ri bad kat kum ki kyndon jong ka Ministry of Home Affairs (MHA).
Haba ai jingkren ha ka sngi sdang jong ka Dorbar Mang tyngka, u Chauhan ula ong ba ka Sorkar kala don ia ka jingmut kaba skhem ban wanrah ia ka jingsuk ba shirta hapoh ka Jylla.
“Ka long kaba kongsan ban wanrah ia ka jingsuk ban pynthikna ia ka jingkiew shaphrang jong ki Nongshongshnong” ula ong haba bynrap ba ka jinglong jingman ka suk ka sain ha Jylla ka long kaba jai jai bha ha une u snem bala leit.
U Lat ula pyntip ruh ba hadien ka jingiasoi ia ka MoU ha u 2022 ban pynbeit ia ki hynriew tylli ki jaka ba iakajia pud, ka kam leh survey kala sdang ha kaban phiah noh ia u pud u sam ba thikna hapdeng ka Meghalaya bad Assam.
U Myntri Rangbah ka Assam bad Meghalaya kila iakynduh biang ha u Jymmang 2023 ban sdang sa ia ka jingiakren halor ki hynriew tylli ki jaka bym pat pynbeit.
Ki Regional Committee kila pynlong ia ki jingiakynduh bad ki Committee na Assam bad ka jingiakren ban pynbeit ia kine ki hynriew tylli ki jaka kila iaid ha ka lynti kaba dei, ula ong.
Nalor kane, u Chauhan u pyntip ba ka Tnad Home (Police) kala nang pynkhlain ia ki jingtei ha ki District nalor ki Iingsah jong ki Pulit. La buh hakhmat duh ruh ban pynkhlain ia ka jingtreikam jong ka Fire Emergency Services.
Ula ong ba ka Tnad kala pyndep ia ka jingthungkam ia 1010 tylli ki kam ba lait ha u snem bala lah, kaban nang pynkhlain shuh shuh ia ka jingtreikam ki Pulit. Palat 3000 tylli ki kam ba dang lait ha ki kyrdan bapher bapher jong ka Tnad Pulit ruh yn sa pyndap noh shen.
 hapoh ki kyndon jong ka Riti Synshar ka Ri bad kat kum ki kyndon jong ka Ministry of Home Affairs (MHA).){kind=link}