Mairang, Jymmang 11: U Chairman jong ka Meghalaya State Planning Board bad MLA ka Mairang Constituency Bah Metbah Lyngdoh, hynne ka sngi u la kyntu ia ki Khynnah Skul kiba dang don ha ki skul, ba kin kiar raimaw raidieng ia ki jingsniew jong ka teknoloji ba mynta.
Une u Lamphang barim ka Jylla ula kren ia kane haba plie ia ka iing skul kaba thymmai jong ka skul Tirot Sing Memorial Government Upper Primary School, Nongkhlaw.
Ha kane ka sngi la don bad ryngkat u Deputy Commissioner ka Eastern West Khasi Hills District, u Bah G. Kharmawphlang, u Syiem ka Hima Nongkhlaw, u Pa’iem P.M Syiemlieh, District School Education Officer ka West Khasi Hills District, I Kong L. Syiemlieh, u Sub-Divisional School Education Officer ka Eastern West Khasi Hills District, u Bah J.Thyrniang, u Headmaster jong ka skul, u Bah W.Warjri, ki nongialam shnong, ki nonghikai, ki khynnah skul bad ki paidbah ka thain.
Kane ka iing skul kaba thymmai ka kynthup ia ki 5 tylli ki kamra bad la kyrmen ba ka jingplie ia kane ka iingskul kaba thymmai, kan pynioh ia ka jaka pule bad hikai kaba kylluid bad kaba paka na ka bynta ki khynnah pule bad ki nonghikai jong kane ka skul.
Haba kren kum u kongsan ha kane ka prokram, u Bah Metbah Lyngdoh u la pynpaw ruh ia ka jingkyrmen ba kane ka iing skul ia kaba la plie ha kane ka sngi, kan iarap ban pynjanai shuh shuh ia ka pule dangle na ka bynta ka jingmyntoi jong ki nonghikai bad ki khynnah pule kumjuh.
Haba kren halor ka juk stad teknoloji, u la kyntu ia ki khynnah pule, ba kin shim ia kaba bha tam ba ka bor teknoloji ka don ban ai bad ruh ban husiar bad kiar raimaw raidieng na ki jingsniew ba ka teknloji ka wanrah.
Kiwei pat kiba la ai jingkren ki kynthup ia u Deputy Commissioner ka Eastern West Khasi Hills District Bah G. Kharmawphlang, Syiem ka Hima Nongkhlaw, u Pa’iem P.M Syiemlieh, I District School Education Officer ka West Khasi Hills District, I Kong L. Syiemlieh, u Sub-Divisional School Education Officer ka Eastern West Khasi Hills District, u Bah J. Thyrniang, u Headmaster jong ka skul, u Bah W.Warjri bad u Sordar jong ka shnong Nongkhlaw, u Bah K. Dkhar.
