Nongstoin, Jymmang 11: Ka seng Meghalaya Youth Federation lyngba u President Bah Hamar Lyngkhoi, ka dawa na ka tnad MeECL, ban bujli mardor ia ki post elektrik kiba la bam sarang naduh na trai, namar kane ka jinglehsting khlem pep ha kawei ka sngi kan sa wanrah ia ka jingma ia ki paidbah nongshong shnong.
Ka seng kala buh ia kane ka jingdawa hadien ka jingleit jurip ia ka jinglong jingman ha ka jingtreikam jong ka tnad MeECL ha ki shnong ba kham jngai na sor Nongstoin, khamtam ha ka shnong Mawduh ha kaba ka la lap ba ka MeECl kam niewkor ia ka jingujor jong ki bor shnong.
Ka seng ka maham ia ka tnad MeECL ba ka dei ban leit bujli mardor noh mardor ia kitei ki post elektrik ki bym long shuh namar lada u slap bad ka lyer ba jur kin wan, ka jingma ka ap ia ki nongshong shnong. Ka seng ka kyntu ba ka MeECL ka dei ban pyndep kloi ia kane ka kam.
