Shillong, Rymphang 28: U Myntri Sorkar Rakkam A Sangma ha ka sngi Balang ula ong ba ki paidbah ka Ri-lum Garo kin ym shah ne ailad shuh ban nang pynkhie im ia ki kynhun kaikhlaw namar kila ngiah bad mad ia ki jingeh namar ki kam kaikhlaw ha ki 20 snem bala leit noh.
“Lah biang te lah biang…ngam tharai ba kin nang ioh jingkyrshan na ki paidbah. Kiba bun ki briew kila mad ia ka jingpang dohnud namar ki kam kaikhlaw ha ki 20 snem bala lah” ong u Rakkam haba iakren bad ki nongthoh khubor.
U Myntri ula kren ia kane halor ka jingpynmih khubor ba kam ban pynkhie im biang ia ka Garo National Liberation Army (GNLA). Ka kynhun GNLA-Regrouped (GNLA-R) kala pynpaw ia shibun ki ishu kiba ktah ia ka Ri-lum Garo lyngba ka rynsan social media.
U Myntri ula ong ba kum kine ki jingpyntip dei ia kaban hap pynshisha bha.
“Ki Pulit bad ki bor syntiat jong ngi kila leh ia ka kam ba donkam ban leh bad ngin dang ban ithuh ia ki briew ba donkti” ula ong.
Haba kylli, u Rakkam ula ong “Nga long kum ka dictionary jong ki kaikhlaw. Nga tip lut ia kaba hapoh bad kaba shabar, ngi lah dep mad lut. Mynshuwa, ki kaikhla wkila wan sha ka Iing jong nga la bunsiem, ngi lah mad ia ki jingeh, ngi la iohi ia ki briew jong ngi kiba shah pyniap”.
Une u Nongialam ka NPP ula ong ba lada ki samla ki don ia kano kano ka jingdawa, ki dei ban wan iakren bad ka Sorkar Jylla ha ka jaka ban rah tiar ialeh.
U Rakkam ula pyntip ba um tharai satia ba ka jingbym iohkam iohjam ka dei ka daw tynrai halor ka jingmih ki kam kaikhlaw ha Meghalaya.
