Shillong, June 16 : Ha ka jingiakhun kaba itynnad bha ha ka lympung ialehkai jong ka Shillong Premier League, ka Langsning FC ka la ioh ban pynliem da ka said ia ka Shillong Lajong ban khur ei ia ki lai point hynne ka janmiet.
Ia katei ka kol kaba kongsan tam jong ka Langsning la ioh ban thep da u Shano Tariang ha ka minit kaba 70 jong ka kylla miet hadien ba ka jingialehkai ha ka kylla step ka la kut khlem da don mano mano ruh ba ioh ban thep kol.
Haba phai shwa sha ka jingiakhun ha ka kylla step, naduh ba sdang hi dei ka Lajong kaba teh lakam ia ka jingialehkai bad kane ka la iai bteng wat haduh ka kylla miet ruh.
Ka Shillong Lajong ka la ioh ruh katto katne ki kabu ksiar kynthup ia ka sien pyrshang kaba nyngkong ha ka minit kaba 18 hynrei ka bol kaba khyrwit da u Amon ka la leit ban dei ia u dieng kol.
Ha kane ka sngi la iohi ruh ba ka Langsning ka la kham pynkhlain ia ka kynhun lada nujor bad u snem 2019 namar ka la don ia ki rangap dien kiba skhem hapoh ka jingialam jong u Ambilstar Sun bad u Dibinroy Nongspung.
Ka jingiakhun ha kane ka sngi Thohdieng pat kan long hapdeng ka Malki pyrshah ia ka Ryntih ha ka por 4baje janmiet. Kane kadei ruh ka sien kaba nyngkong ia ka Malki ban mih pyrthei biang sa shisien pat naduh u snem 2018.
