Shillong, Nohprah 14: Ka Meghalaya ka dei ka Jylla napoh ka thain shathei lam mihngi (North East) kaba kham lah ban khring bun iaki nongwan shakai pyrthei na bar Ri ban ia nujor bad kiwei ki Jylla ka thain.
Ia kane la ong da u Myntri ka tnat Tourism u Bah Paul Lyngdoh haba kren sha ki lad pathai khubor hadien ka jingplie pyrda iaka tamasa Winter Tales ha Nan Polok.
U Bah Paul ula iathuh ba dang shen ka Meghalaya kala ioh iaka khusnam ‘Next Best Destination’ naka Outlook Magazine bad kane ka long ka burom kaba khraw iaka Jylla watla kadei ka Jylla kaba rit.
Ula ong ba kane ka jingioh iaka khusnam ka dang pynpaw nam shuh shuh iaka Meghalaya sha baroh kawei ka pyrthei bad nangne shakhmat, ka jingtuid ki nongwan shangkai suwari na bar Ri kan nang kiew shuh shuh.
“Ka tnat Tourism ka Sorkar Meghalaya kala leh phylla napdeng kiwei ki Jylla ka thain shathei lam mihngi bad dei namar kane ki nongwan shangkai suwari na bar Ri ki kham sngewtynnad bha ban wan sha kane ka Jylla ban ia nujor bad kiwei ki Jylla na kane ka thain” ong u Bah Paul.
U Bah Paul ula iathuh ba ka phang pdeng jong ka Winter Tales mynta u snem kadei ban pynneh pynsah iaka mei mariang bad mynta ka kynti la thong jong ka tamasa kadei ban pyni nam iaki sap kyrpang ki trai Ri trai muluk lyngba ki jait jingthain, ki jingshna, ki jingdro bad kiwei kiwei de kiba long kyrpang hapoh ka Meghalaya.
Haba pynrem iaki ba kynthoh iaki tamasa, u Myntri ka tnat Tourism ula ong “Ngi pynlong iaki tamasa katkum ka mang tynga bala mynjur hapoh ka ïing dorbar bad haduh mynta ka tnat kam pat ju shim pisa na kiwei ki tnat ban pynlong iaki tamasa bapher bapher”.
U Bah Paul ula ong baka tnat Tourism kadei kawei na ki tnat treikam Sorkar kaba kiew sted bha bad kaba lah bha ban kyntiew iaka ioh ka kot jong ki paidbah bad naka liang ka tnat kam lah ban ap iaka jingbiang lut jong kiwei ki tnat hashuwa ban pynlong iaki tamasa bapher bapher.
 kaba kham lah ban khring bun iaki nongwan shakai pyrthei na bar Ri ban ia nujor bad kiwei ki Jylla ka thain.){kind=link}